Ақтөбе облысы Қазақстанның 4-ші мұнай өндіруші өңірі болып табылады

Ақтөбе облысы мұнай өндіру көлемі бойынша 4-ші мұнай өндіруші өңір болып табылады, оның үлесіне ел бойынша мұнай өндірудің жалпы көлемінің шамамен 6% - ы тиесілі. Жалпы өңірде өндірілетін мұнай қоры шамамен 190,8 млн. тоннаны құрайды, - деп хабарлады ҚР Энергетика вице-министрі Әсет Мағауов 2023 жылғы 6 наурызда Ақтөбе облысының тұрғындарымен кездесуде сөйлеген сөзінде.

Алайда, Ақтөбе облысында игеріліп жатқан кен орындарының басым бөлігі игерудің кеш сатыларында тұр, бұл кен орындарында мұнай өндірудің жыл сайынғы табиғи төмендеуі байқалады. Жер қойнауын пайдаланушыларды қолдау және кен орындарының өмірлік циклін ұзарту мақсатында ҚР Энергетика министрлігі Ұлттық экономика және Қаржы министрліктерімен бірлесіп, өндірудің жаңа технологияларын дамытуға және енгізуге міндетті түрде қайта инвестициялау шартымен жетілген кен орындарына, оның ішінде салықтық сипаттағы қолдау шараларының топтамасын ұсыну мәселесін пысықтауда.

Сондай-ақ Әсет Мағауов өз баяндамасында халықты жанар-жағармай материалдарымен қамтамасыз ету мәселелеріне де тоқталды. ҚР Энергетика министрлігі стационарлық автожанармай құю станцияларында АИ-80, 92-93 бензиндерін, жазғы және маусымаралық дизель отынын бөлшек саудада өткізудің шекті бағаларын реттеуді белгіледі.

Қазақстанда дизель отыны, АИ-92, АИ-95 бензинінің 1 литрі үшін бөлшек сауда бағасы көршілес мемлекеттермен салыстырғанда едәуір төмен, бұл отандық мұнай өнімдерін сыртқа әкетуге ықпал етеді және ішкі нарықта тапшылықты тудырады.

Естеріңізге сала кетсек, отандық мұнай өнімдерін әкетуді болдырмау мақсатында Министрлік мынадай шаралар қабылдаған болатын:

- дизель отынының бағасына саралау белгіленді;

- мұнай өнімдерін автомобиль көлігімен әкетуге тыйым салу ұзартылды.

Бұдан басқа, мұнай және мұнай өнімдерін жеткізу жүйесінде өнімсіз делдалдарды болдырмау мақсатында заңнамалық нормалар қабылданды.

Түзетулер шеңберінде жер қойнауын пайдаланушылар немесе олармен үлестес тұлғалар өңдеу үшін мұнайды тікелей жеткізуді, мұнайды тікелей мұнай өңдеу зауыттарының өздерінің сатып алуын, мұнай өнімдерін тек меншік немесе жалға алу құқығында мұнай базалары бар тұлғаларға көтерме жеткізуді жүзеге асыру ұсынылды.

• 06.03.2023
• 174