Маңғыстаулық кәсіпкерлердің жобаcы «Chevron» инвестициялық қорына таныстырылды

15 наурызда аймақ басшысы Нұрлан Ноғаев ірі интеграцияланған энергетикалық «Chevron Direct Investment Fund» жеке компаниясы Еуразиялық бөлімшесінің Қаржы жөніндегі бас менеджерімен кездесті. Тараптар өңірде бірлескен жобаларды жүзеге асыру мәселелерін талқылады, - деп хабарлайды Маңғыстау облысы әкімінің баспасөз қызметі.

Жиынға облыс әкімінің орынбасарлары, компанияның Еуразиялық бөлімшесінің қаржы жөніндегі бас менеджері Дэймон Торнберг, «Теңізшевройл» ЖШС бас директорының кеңесшісі Айбек Крамбаев, мемлекеттік органдардың басшылары, сондай-ақ бизнес өкілдері қатысты.

Кездесу барысында тараптар «Chevron Direct Investment Fund» инвестиция қоры арқылы орта және шағын бизнесті қаржыландыру мәселесін талқылады.  Бұл қорға өңірдің дамуы үшін әлеуметтік-экономикалық маңызы бар жобалар ұсынылды. Атап айтқанда, Бейнеу ауданындағы жүн өңдеу жобасы, шипажай-сауықтыру кешені, Ақтаудағы көкөніс қоймасы және басқа да жобалар.

CDIF (Қазақстандағы Chevron Direct Investment Fund) – Қазақстандағы жергілікті қамтуды және қоршаған ортаны қорғауды қолдауға бағытталған Chevron компаниясының тікелей инвестициялық қоры.

Аймақ басшысы Нұрлан Ноғаев Маңғыстау облысының инвестициялық жобаларды жүзеге асыруға әлеуеті зор екенін атап өтті.

 - Сіздерді көргенімізге қуаныштымыз.  Өңіріміздің дамуына қызығушылық танытқаныңыз үшін алғыс айтқым келеді.  Мемлекет басшысы Қасым-Жомарт Тоқаевтың тапсырмасы бойынша мемлекеттік органдар инвестициялық ахуалды жақсарту бойынша жүйелі шаралар қабылдап, осы бағытта тұрақты жүйелі жұмыстар жүргізілуде. Біздің кездесуіміз өзара тиімді ынтымақтастық бойынша сындарлы ұсыныстар әзірлеуге мүмкіндік беретініне сенімдімін, - деді Нұрлан Ноғаев.

• 15.03.2023
• 222