Маңғыстауда Наурыз мейрамын тойлау басталды

Бүгін, 20 наурызда облыс әкімі Нұрлан Ноғаев «ҚазТрансГаз Аймақ» АҚ Маңғыстау өндірістік филиалында болып, ұжымды Наурыз мерекесімен құттықтады, - деп хабарлайды Маңғыстау облысы әкімінің баспасөз қызметі.

Мекеме ұжымының қатысуымен өткен шара аясында өңірдің әлеуметтік-экономикалық дамуына қосқан үлесі үшін кәсіпорынның бірқатар қызметкері Маңғыстау облысы әкімінің Алғыс хатымен марапатталды.

100-ге жуық маман жұмыс істейтін "ҚазТрансГаз Аймақ" АҚ Маңғыстау өндірістік филиалы заңды және жеке тұлғаларға газ тасымалдау және тауарлық газды сату бойынша қызметтер көрсетеді. Кәсіпорын өңірдің экономикалық дамуын арттыруға бағытталған ірі жобаны іске асыруда. Бұл Құрық ауылы аумағынан АГРС-нан «Сарша» жеріне дейін және «Жылы жағажай» курорттық аймағына газ құбырын тарту. Тұрғындарды коммуналдық- тұрмыстық және өнеркәсіптік кәсіпорындарды көгілдір отынмен ақаусыз, үздіксіз газбен қамтамасыз ету және газ тарату желілерінің өткізу қабілетін жақсарту мақсатында 15 жобаға  ЖСҚ әзірленді.  Бұл жобалардың құрылыс-монтаждау жұмыстары 2023 жылға жоспарланған.

Өңір басшысы Нұрлан Ноғаев Маңғыстау облысы нарығындағы жалғыз газ операторы «ҚазТрансГаз Аймақ» АҚ мамандарын Наурыз мейрамымен құттықтады.

 – «ҚазТрансГаз Аймақ» АҚ және еншілес кәсіпорындардың қызметкерлері халықты көгілдір отынмен қамтамасыз етіп, өндіріс ошақтарының үздіксіз жұмыс істеуіне, жаңадан жұмыс орнының ашылуына, халық әл-ауқатының артуына ықпал етуде.   Еліміздің мұнай-газ саласында атқарып жатқан еңбектеріңіз өлшеусіз.  Мемлекет басшысының тапсырмасын орындау мақсатында облыста бірнеше ірі жоба жүзеге асып жатыр.  Жақында Жаңаөзен-Бейнеу газ құбырының 2-желісінің құрылысы басталды.  Орта және төменгі қысымда газ құбырларын тарту, өндіріс ошақтары мен халықты жоғары газ қысымымен қамтамасыз ету бәрімізге ортақ міндет, - деді Нұрлан Ноғаев.

• 24.03.2023
• 173