Ақтауда экологиялық акция аясында ағаш отырғызылды

Бүгін, 21 наурызда Наурыз мерекесі қарсаңында аймақ басшысы Нұрлан Ноғаев «Таза табиғат» акциясын қолдап, Ә.Кекілбаев мұражайының аумағына ағаш отырғызды, - деп хабарлайды Маңғыстау облысы әкімінің баспасөз қызметі.

Сенбілікке облыс әкімі Нұрлан Ноғаев, облыс әкімінің орынбасарлары, қала әкімі, «Маңғышлақ тәжірибелік-ботаникалық бағы» республикалық мемлекеттік кәсіпорнының бас директоры Ақжүніс Иманбаева, «Green City Aktau» ЖШС ұжымы, облыстық отбасы үлгісіндегі балалар ауылының тәрбиеленушілері, сондай-ақ бөлім басшылары қатысты.

Нұрлан Ноғаев мерекеге орай ағаш отырғызу ұйымдастырылып жатқанын атап өтті. Сондай-ақ Наурыз мейрамы бірлік мерекесі, бұл күні тұрғындар көктемнің жылуын күтетінін айтты.

 – Қазақ халқы үшін Наурыз – жаңарудың, ізгілік пен тазалықтың мерекесі.  Осыған орай жыл сайын дәстүрлі түрде көктем және күз айларында көгалдандыру, тазалық айлығы өтеді. Бүгін Ұлыстың ұлы күні Наурыз мейрамы қарсаңында бас қосып, осындай игі шараны өткізіп отырмыз. Қазір елімізде «Таза табиғат» экологиялық акциясы өтіп жатыр. Мұндай акциялар халықтың экологиялық мәдениетін, табиғатқа жанашырлығын арттырады, - деді аймақ басшысы Нұрлан Ноғаев.

Ә.Кекілбаев мұражайының аумағына 100-ге жуық ағаш отырғызылды: шырша, қарағай, туя, емен, бал шегірткесі, өрік, алма ағаштары және т.б.

Барлық көшет «Маңғышлақ тәжірибелік-ботаникалық бағы» республикалық мемлекеттік кәсіпорнынан алынды.

Айта кетейік, 2023 жылдың соңына дейін облыста 12 мыңнан астам көшет отырғызу жоспарланған.

• 24.03.2023
• 157