Ұлттық экономика министрі Мажарстанның Қазақстандағы Төтенше және Өкілетті елшісімен кездесті

Кездесу барысында Әлібек Қуантыров пен Отто Иван Рона Жаңа экономикалық саясат шеңберіндегі екіжақты ынтымақтастық мәселелерін талқылады.

Атап айтқанда, жасыл энергетиканы дамыту және су ресурстарын тиімді пайдалану мәселелері көтерілді. Осы бағытта тараптар қажетті ақпаратпен алмасуға және технологияларды трансферттеуге қызығушылық танытты. Сонымен қатар, фармацевтика саласын, атом энергетикасын дамыту, ҚР-дағы индустриялық жобаларға инвестиция тарту мәселелері талқыланды.

«Қазақстан әр түрлі энергия көздерін дамытуға және қаражат салуға дайын инвесторларды қабылдауға әрқашан дайын. Ірі және шағын жобаларды жүзеге асыру арқылы энергетикалық тепе-теңдікті қалпына келтіру жоспарымызда бар. Мемлекет «Тарифті инвестицияға айырбастау» тұжырымдамасын жүзеге асыруда», - деп атап өтті Ә.Қуантыров.

«Біз Қазақстанмен өзара іс-қимылдың әлеуетін жоғары бағалаймыз және ынтымақтастықтың барлық салаларын дамытуға ниеттіміз. Менің ойымша, бәсекеге қабілетті салаларды айқындауымыз керек», - деді О.И. Рона.

Өз кезегінде, ҰЭМ басшысы екіжақты ынтымақтастықты дамытудың үлкен әлеуеті бар екенін атап өтті. Министрдің айтуынша, ҚР үшін жаңартылатын энергия көздері саласындағы инвестициялық жобалар ерекше қызығушылық тудырады.

Тараптар осы және басқа да маңызды мәселелерді 2023 жылдың қаңтар айының соңында Будапешт қаласында өтетін Үкіметаралық комиссияның отырысында талқылауға ниетті.

• 05.04.2023
• 112