«ЭЫДҰ-ның бизнесті жауапты жүргізу стандарттарын ұстану Қазақстан үшін басты міндеттердің бірі болып табылады», - Ә.Қуантыров

Парижде (Франция) ҚР ҰЭМ басшысы Экономикалық ынтымақтастық және даму ұйымының (ЭЫДҰ) бизнесті жауапты жүргізу жөніндегі Министрлік кездесуге қатысты.

Министр өз сөзінде Қазақстан ЭЫДҰ-ның бизнесті жауапты жүргізу бойынша ұсынымдар жиынтығының маңыздылығын мойындайтынын атап өтті.

«ҚР Үкіметі көптеген жылдар бойы ұлттық заңнаманы адам құқығын қорғау және халықтың әлеуметтік осал тобы үшін қолайлы жағдай жасау саласындағы халықаралық ұйым стандарттарымен интеграциялау бойынша тұрақты жұмыс жүргізіп келеді. Біз қазақстандық және шетелдік компаниялардың жауапкершілігі мен тиісті қарым-қатынасын қамтамасыз ету мақсатында БҰҰ-мен, Халықаралық еңбек ұйымымен және халықаралық қаржы институттарымен табысты ынтымақтастық орнаттық», - деді Ә.Қуантыров.

Оның айтуынша, Қазақстанда ірі компаниялар БЖЖ (бизнесті жауапты жүргізу стандарттары) элементтері бар корпоративтік әлеуметтік жауапкершілікті белсенді түрде енгізуде.

«Әйелдерді, жастарды, ауыл тұрғындарын қолдау орталықтары құрылып, кәсіпкерлік бастамаларды қолдаудың жаңа құралдары әзірленді», - деп атап өтті ол.

Бизнесті жауапты жүргізу стандарттары мен ЭЫДҰ-ның Басшылық қағидаттарын ілгерілетуде Қазақстанның Ұлттық байланыс орталығы үлкен рөл атқарады. Қазіргі уақытта БЖЖ стандарттарын сақтау процестерінің ашықтығын қамтамасыз ету үшін ҰБО-ны ұлттық медиация жүйесіне және еңбек дауларын шешу процесіне енгізу мәселесі пысықталуда.

«Кәсіпорындардың осы стандарттарды қолдануы адам құқығы, қоршаған ортаны қорғау және еңбек қатынасы секілді үш бағыт бойынша міндетті болуы тиіс. Бірақ алдын ала ерікті түрде зерттеуден өту керек. Біздің еліміз үшін ЭЫДҰ бизнесті жауапты жүргізу стандарттарын ұстану басты міндеттердің бірі болып табылады», - деді Ә.Қуантыров.

Сондай-ақ ЭЫДҰ алаңында министр бірқатар екіжақты кездесулер өткізді.

• 06.04.2023
• 96