БҰҰДБ мен ҚР ҰЭМ ел экономикасын сауықтыру және ШОК қолдау шараларын талқылады

Қайырлы күн, құрметті блог қонақтары!

2020 жылғы 2 желтоқсанда онлайн режимде БҰҰ Даму бағдарламасының өкілдерімен және оның Қазақстандағы Тұрақты өкілі Якуп Бериш мырзамен кездесу өтті, оның шеңберінде БҰҰ-ның 2015-2030 жылдарға арналған Орнықты даму мақсаттары, БҰҰДБ-ның 2021-2025 жылдарға арналған жаңа Елдік бағдарламасын іске асыру, сондай-ақ COVID-19 пандемиясының әлеуметтік-экономикалық салдарын еңсеру мәселелері талқыланды.

2021 – 2025 жылдарға арналған жаңа Елдік бағдарламаны іске асыру Қазақстанның БҰҰДБ-мен ынтымақтастығының маңызды бағыты болып табылады.

Біз Қазақстан дамуының 4 басым бағыты бойынша іске асыру жоспарланып отырған осы бағдарламаны қолдаймыз: 1) әлеуметтік осалдық пен теңсіздік проблемаларын шешу; 2) мекемелердің тиімділігін арттыру және есептілігін күшейту; 3) әртараптандырылған экономикалық өсуге жәрдемдесу; 4) климаттың өзгеруіне және дүлей зілзалаларға қарсы күрес.

Өз кезегінде, БҰҰДБ-ға «Global Rapid Response Facility» қоры аясында қашықтықтан жұмыс істеу үшін халықтың, жастардың, шағын және орта бизнестің неғұрлым осал топтарын қолдауға, мемлекеттік қызметшілердің әлеуетін арттыруға көмектескені үшін алғыс айтамыз.

БҰҰДБ шаралары ел экономикасын сауықтыруға және шағын және орта кәсіпорындарды қолдауға оң әсерін тигізеді деп есептейміз.

• 03.12.2020
• 425