Маңғыстауда автобус паркін жаңғырту жалғасуда

6 сәуірде өңір басшысы Нұрлан Ноғаевтың төрағалығымен «Каспий» ӘКК АҚ директорлар кеңесінің отырысы өтті. Онда қоғамдық көлікті жаңарту жоспарлары талқыланды, - деп хабарлады Маңғыстау облысының әкімінің баспасөз қызметі.

Маңғыстаудың автобус паркін одан әрі кеңейту жұмыстары өңір үшін өзекті міндеттің бірі. 2023 жылы «Ақтау-Басқұдық-Ақтау» және «Ақтау-Батыр-Ақтау» бағыттарында жүретін 20 заманауи автобус сатып алу жоспарлануда.

Қоғамдық көлікті жаңарту жобасына бір миллиард теңгеден астам (1 миллиард 323 миллион теңге) қаржы қарастырылған. Автобустар лизинг негізінде сатып алынады. Жобаны іске асыру мерзімі – 7 жыл. Инвестициялық жоба аясында 30 жаңа жұмыс орны ашылады. Жоба маршруттардың жиілігін арттырады. Сондай-ақ инвестициялық жоба отандық машина жасау саласын дамытуға септігін тигізеді.

Облыс әкімі Нұрлан Ноғаев жобаны жүзеге асыру азаматтардың өмір сүру сапасын жақсартуға және бұрын бекітілген тарифтерді сақтай отырып, қоғамдық көлік қызметінің сапасын арттыруға бағытталғанын атап өтті.

 – Бүгінде Маңғыстаудың автобус паркі 40 пайызға жаңарған. Бұл көрсеткішті 100 пайызға жеткізу жоспарланып отыр.  Бұл қоғамдық көлікті жаңғырту жөніндегі инвестициялық жобаны жүзеге асырудың арқасында мүмкін болды. Тұрғындармен кездесулерде облыс тұрғындары ауылдарға қатынайтын ескі автобустарда жағдайдың жоқтығына шағымданды.  Сатып алынған жаңа автобустар заман талабына сай.  Олардың сыйымдылығы - 78 адам, жүріп-тұруы шектеулі адамдарға бейімделген, сонымен қатар автоматты бейнебақылау жүйесімен және тегін Wi-Fi жүйесімен жабдықталған», - деді Нұрлан Ноғаев.

• 07.04.2023
• 154