Ақтауда теңіз жағалауындағы негізсіз берілген жер телімдері сот арқылы қайтарылмақшы

6 сәуірде өңір басшысы Нұрлан Ноғаевтың төрағалығымен сыбайлас жемқорлыққа қарсы күрес жөніндегі комиссияның отырысы өтті. Жиында Маңғыстау облысының жер ресурстарын басқару департаментінің теңіз жағалауында орналасқан 21 жер телімін қайтару туралы сотқа талап-арыз бергені белгілі болды, - деп хабарлайды Маңғыстау облысы әкімінің баспасөз қызметі.

Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті басшысының бірінші орынбасары Біржан Хайруллиннің айтуынша, туризмді дамытуға арналған 21 жер телімінің негізсіз берілгені анықталған. Маңғыстау облысының жер ресурстарын басқару департаменті жалпы көлемі 43 гектар жер телімін мемлекет меншігіне қайтару туралы сотқа талап арызбен жүгінді.

Аймақ басшысы Нұрлан Ноғаев жер телімдерін беруде ашықтықты сақтауды тапсырды.

 – Жергілікті атқарушы органдар өкілдерінің жер телімдерін беру бойынша негізсіз қабылдаған шешімдері өңірдегі кәсіпкерлік пен туризмнің дамуына кері әсерін тигізуде.  Мемлекет басшысы Қасым-Жомарт Тоқаевтың тапсырмасына сәйкес, бізге өңірдің экономикалық және әлеуметтік ахуалын арттырып, орта және шағын бизнесті дамытуға тең жағдай жасау қажет.  Жерді беруде шектен шығуға жол бермеу керек, – деді Нұрлан Ноғаев.

Сондай-ақ жиында сыбайлас жемқорлыққа қарсы күрес мәселелері талқыланды. Мәселен, облыста кәсіпкерлердің құқығын қорғау жұмыстары қарқынды жүргізілуде.  Атап айтқанда, кәсіпкерлікті қорғау жобасы аясында 86 кәсіпкерлік субъектінің өтініші қаралып, оның 58-інде проблемалық мәселелер жойылды.  Сондай-ақ 208 кәсіпкердің құқығы мен мүддесі қорғалған.

Былтыр төрт сыртқы сараптама жүргізіліп, 102 ұсыныс жасалған.  Сыбайлас жемқорлыққа қарсы мониторинг бойынша 13 іс-шара жүргізілді, анықталған тәуекелдер бойынша 51 ұсыным берілді. Қылмыстың алдын алу мақсатында әкімшілік құқық бұзушылық тәжірибесі де күшейтілді.

• 07.04.2023
• 155