Ақтауда Карима Сахарбаеваның шығармашылық кеші өтті

7 сәуір күні Ақтауда Қазақстанның еңбек сіңірген қайраткері, Махамбет атындағы сыйлықтың лауреаты, профессор Карима Сахарбаеваның шығармашылығына арналған «Аманат арқауы – ұстаз бен шәкірт» атты шығармашылық кеш өтті, - деп хабарлайды Маңғыстау облысы әкімінің баспасөз қызметі. 

Шараға облыс әкімі Нұрлан Ноғаев, өнер қайраткерлері, зиялы қауым өкілдері, қала тұрғындары мен қонақтары қатысты.

Кешті Маңғыстаудың құрметті күйшісі Сержан Шәкірат «Күй басы» күйімен ашты.

Карима Сахарбаева 100-ден астам халықаралық, республикалық байқаулардың лауреаттарын тәрбиелеп шығарған ұстаз.  Мәдени кеште Құрманғазы атындағы Қазақ ұлттық консерваториясының студенттері мен өңірге танымал өнерпаздар өнер көрсетті.

Аймақ басшысы Нұрлан Ноғаев Карима Сахарбаеваның қазақ өнерінің дамуына өлшеусіз үлес қосқанын атап өтті.

 – Бүгін біз тамаша кештің куәсі болдық. Сіздің қазақ музыка өнерінің дамуына қосқан үлесіңіз ерекше.  Өскелең ұрпақтың музыкаға деген сүйіспеншілігін ояту жолындағы еңбегіңізге баға жетпейді, – деді Нұрлан Ноғаев.

• 10.04.2023
• 147