«Көкшетау» халықтық би ансамблі халықаралық хореографиялық өнер байқауының гран-при иегері атанды

Ақмола облысы мәдениет басқармасы, «Көкшетау» халықтық би ансамблінің фан-клубы сүйікті жеңімпаздарын гүл шоқтары және ыстық ықылас тілектерімен құшақ жая қарсы алды.

Ансамбль Шымкент қаласының «Түркістан» сарайында өткен «Қазына» фестиваль қозғалысы мен «Hermes Travel Agency» туристік агенттігінің ұйымдастыруымен Қазақстан Республикасының Халық әртісі, өнертану кандидаты, балетмейстер Әбіров Дәурен Тастанбекұлының
100 жылдығына арналған «ШУАҚТЫ ҚЫЗҒАЛДАҚТАР» Халықаралық хореографиялық өнер байқауының ГРАН-ПРИ және жүлделі бірінші орын иегерлері атанды.

Байқауға «Көкшетау» мәдениет сарайының «Көкшетау» халықтық би ансамблі қатысып, қазылар алқасы мен көрермен назарына 5 хореографиялық композиция ұсынды.

«Бойжеткен» ансамблінің орта тобының билері мен «Орамалмен қытай биі» ГРАН-ПРИ, «Тұмар» – 1 орынды иеленді. «Еңбек түтігі береке» және «Салтанат» негізгі құрамының билері жүлделі бірінші орындарға ие болды.

«Барлығы біздің балаларымызға таң қалды, қандай әдемі, қаншалықты жақсы билейді, жарайсыңдар!», деп атап өтті ансамбль жетекшісі Әсел Токежанова.

Айта кетейік,«Көкшетау» халықтық би ансамблі өз шеберлігімен барша халықты қуантып, жақсы көңіл күй сыйлап, би тілімен, өнерімен өлкеміздің сұлулығын суреттеуде. Аталмыш ансамбілдің ғұмырнамасы 1974 жылы Ленин атындағы мәдениет сарайында басталған. Ансамбльдің тұсаукесері Көкшетау қаласының 150-жылдық мерейтойына арналған мерекеде өткен еді. Құнарлы еңбек етіп, үлкен шығармашылық жетістіктер мен қазақ ұлттық би өнерін насихаттаған үшін «Көкшетау» би ансамблі Қазақ КСР-ның мәдениет Министрлігінің жарлығымен «халықтық» деген атаққа ие болды.

Көптеген жылдар бойы ұжым шығармашылық қызметтің басты бағытын – қазақ халық биін насихаттауды сақтап қалды. Ол Ақмола облысы мен облыс орталығы – Көкшетау қаласының белді ұжымдарының бірі болып табылады. Ансамбль репертуарында қазақ халық және эстрадалық билері бар.

Өнер ұжымын жеңісімен құттықтай отыра, шығармашылық табыс тілейміз! Шығар шыңдарыңыз, бағындырар белестеріңіз бен алар асуларыңыз биік болсын!

• 12.04.2023
• 135