Ақтауда облыстық мәслихаттың кезектен тыс сессиясы өтті

14 сәуірде Ақтауда облыстық мәслихаттың кезектен тыс сессиясы өтті. Күн тәртібінде 2023-2025 жылдарға арналған облыстық бюджетке өзгерістер мен толықтырулар енгізу мәселесі қаралды, - деп хабарлайды Маңғыстау облысы әкімінің баспасөз қызметі.

Сессияда мына мәселелер қаралды:
1. Маңғыстау облыстық мәслихатының 2022 жылғы 9 желтоқсандағы № 16/175 «2023-2025 жылдарға арналған облыс бюджеті туралы» шешіміне өзгерістер енгізу туралы.
2. Маңғыстау облыстық мәслихатының 2018 жылғы 20 наурыздағы № 17/212 «Маңғыстау облыстық мәслихатының аппараты» мемлекеттік мекемесінің «Б» корпусы мемлекеттік әкімшілік қызметшілерінің қызметін бағалаудың әдістемесін бекіту туралы» шешіміне өзгеріс енгізу туралы.
3. Облыстық мәслихаттың 2017 жылғы 13 желтоқсандағы № 15/183 «Маңғыстау облысы әкімдігінің дербес құрамы туралы» шешіміне өзгерістер енгізу туралы.
4. Облыстық мәслихаттың 2022 жылғы 9 желтоқсандағы № 9/189 «Маңғыстау облыстық мәслихатының 2023 жылға арналған жұмыс жоспары туралы» шешіміне өзгеріс енгізу туралы.

Маңғыстау облысының экономика және бюджеттік жоспарлау басқармасының басшысы Марина Альбекова биылғы нақтылауды ескере отырып, облыстық бюджет - 445 млрд теңге, оның ішінде жергілікті бюджет көлемі - 350 млрд теңге, республикалық бюджеттен берілетін трансферттер көлемі 95 млрд теңге құрағанын атап өтті. 2023 жылға арналған бюджетті нақтылау Мемлекет басшысы мен Үкімет тапсырмаларын, өңірді дамытудың кешенді жоспарымен бекітілген іс-шараларды орындауға, сондай-ақ басқа да бірқатар маңызды міндеттерді қаржыландыруға бағытталған. Бюджеттік құрылымның негізгі үлесі - әлеуметтік салаға қосымша 16 млрд теңге бөлінді. Бұл қаржыға 2 және 4-сынып оқушыларын толыққанды ыстық тамақпен қамтамасыз ету, жұмыссыздарды қоғамдық жұмысқа тарту және «Жұмыс жасаймын» жобасын іске асыру, мемлекеттік шығармашылық және спорттық тапсырыс, әлеуметтік ұйымдардың материалдық-техникалық базасын жаңарту, нысандарды ағымдағы және күрделі жөндеу мен басқа да шығындар кіреді.

Сондай-ақ «Ауыл – ел бесігі» жобасы аясында Ақшұқыр, Шетпе ауылдарындағы мектептерге қосымша ғимарат, Сайөтес, Дәулет ауылдарында 400 орындық кітапханасы бар клуб салу жоспарланып отыр.

Сонымен қатар жергілікті бюджет есебінен Маңғыстау ауданы Тұщыбек ауылындағы бастауыш мектепке қосымша ғимарат салу, Бейнеу ауылында 200 орындық жатақханасы бар колледж құрылысының жобалық-сметалық құжаттамасын әзірлеу жоспарлануда.

Экономиканың нақты секторын қолдау мақсатында жергілікті бюджеттен қосымша 12,5 млрд.теңге, республикалық бюджеттен 37,5 млрд.теңге бөлінді. Олар «МАЭК» аумағында өнімділігі тәулігіне 24 мың текше метр су тұщыту қондырғысы құрылысы, Құйылыс кен орнынан Каспий су тұщыту зауытына дейін су құбырын реконструкциялау, аудандар мен Ақтау қаласының елді мекендерін табиғи газбен қамтамасыз ету мақсатында «Жаңаөзен-Ақтау» магистральдық газ құбырының 4-ші желісін салу жұмыстарының бастамасына, Ақтау қаласындағы 3 шағынауданында жылу желілерін қайта құрылымдауға, Каспий тұщыту зауытына мембраналарды сатып алуға, Бейнеу ауданы мен Жаңаөзен қаласының су құбырларының жөндеу жұмыстарына, Бейнеу (Сам, Ноғайты, Тұрыш) және Түпқараған аудандарында (Қызылөзен) орталықтандырылған сумен жабдықтау желілерін салуға, Маңғыстау ауданында (Боздақ, 15 станция, Қияқты, Тиген, Тасмұрын) су тұщыту қондырғыларын орнатуға, Түпқараған, Маңғыстау аудандарының және Ақтау қаласының коммуналдық кәсіпорындарына су тасымалдайтын арнайы техника сатып алуға, Маңғыстау, Қарақия аудандарының автомобиль жолдарын құрылысын және Ақтау қаласының Шығыс 2, 3 шағынауданындағы қалаішілік жолдарының құрылысын аяқтауға және тағы басқа жобаларға бағытталды.

Бұдан бөлек, 90 автобус сатып алу, аз қамтылған отбасыларды тұрғын үймен қамтамасыз етуге 300 пәтер сатып алу, жастарды қолжетімді баспанамен қамтамасыз ету үшін Отбасы банкпен бірлесіп, «Маңғыстау жастары» бағдарламасын іске қосу, жас кәсіпкерлерді қолдау мақсатында «Даму» қорымен бірлесіп, өңірлік «MANGYSTAU BUSINESS» бағдарламасын іске қосу, «Ауыл аманаты» жобасын орындау және «Жануарларға жауапкершілікпен қарау» туралы жаңадан қабылданған заң талаптарын іске асыру жоспарланды.

Нұрлан Ноғаев бюджет шығыстарының басым бөлігі өңірді сумен қамтамасыз ету, әлеуметтік инфрақұрылымды дамыту сынды маңызды мәселелерді шешуге бағытталатынын атап өтті.

 – Бюджетті нақтылау мәселелеріне қолдау білдірген депутаттарға өз атымнан және облыс әкімдігіндегі әріптестерімнің атынан алғыс айтамын.  Кешегі комиссия отырысында баяндалып, талқыланып, бөлінген қаржы өңірдің әлеуметтік-экономикалық дамуы мен қоғамдық-саяси тұрақтылығына тікелей әсер етуде. Бұл қаражат тиімді мақсатта жұмсалса, үлкен өзгерістердің куәсі боламыз. Президенттің тікелей қолдауымен өңірдегі өзекті ауыз су мәселесін шешуге, инфрақұрылымды дамытуға республикалық бюджеттен қаржы бөлініп отыр, - деді Нұрлан Ноғаев.

• 17.04.2023
• 164