Астанада жас батырлар шеруі өтті

8 сәуірде Қазмедиа орталығында өткен марапаттау рәсіміне жас батырлар мен олардың ата-аналары шақырылды.

Іс-шараны ҚР Ақпарат және қоғамдық даму министрлігінің Жастар және отбасы істері комитеті мен ҚР Оқу-ағарту министрлігінің Балалар құқықтарын қорғау комитеті ұйымдастырды.

8 бен 16 жас аралығындағы батырлар Елордаға Атырау, Қарағанды, Қызылорда, Солтүстік Қазақстан, Түркістан облыстарынан келді.

Сын сағатта қабылдаған батыл шешімдерінің арқасында олар ондаған адамның өмірін құтқарып қалды.

Жас батырлардың арасындағы ең кішісі - сегіз жасар Нұриден Амантай. Ол үйдегі өрт кезінде туған әпкесін құтқарып қалды. Әмірхан Абай, Нұрболат Ермағамбет және Сұлтан Малкаджар суға батып бара жатқан досын құтқарды. Тоғыз жасар Жансерік Әлім өрт кезінде ең жақын туыстары - әпкелері мен ағасын құтқарды. Оразәлі Зиноллаев, Саян Еспул, Марал Ғаниев пен Нұрполат Нұркелді кішкентай балаларды суға батып бара жатқан жерінен құтқарып қалды...

Салтанатты марапаттау рәсімінде ҚР Оқу-ағарту министрі Ғани Бейсенбаев пен ҚР Ақпарат және қоғамдық даму вице-министрі Евгений Кочетов балаларға және олардың ата-аналарына алғыс хаттар мен түрлі сыйлықтар табыстады.

Сонымен қатар, марапаттау шарасы аясында, жас батырларға қызықты мәдени-демалыс бағдарламасы: Астана қаласының спорт сарайлары мен мұражайларына, сондай-ақ Қазмедиа орталығына арнайы экскурсиялар ұйымдастырылды. Марапаттау күнінің соңында қонақтар елордалық Қ.Қуанышбаев атындағы қазақ драма театрына барды.
 

• 18.04.2023
• 163