Ақтөбе облысындағы қоғамдық орындарда 3000 бейнебақылау камерасы орнатылады

Ақтөбе облысының әкімі Ералы Тоғжановтың төрағалығымен төтенше жағдайлардың алдын алу және жою, құқық бұзушылықтардың алдын алу жөніндегі ведомствоаралық, сондай-ақ сыбайлас жемқорлыққа және терроризмге қарсы комиссиялардың бірлескен отырысы өтті.

Отырыс жұмысына құқық қорғау, арнайы органдардың, облыстық департаменттер мен басқармалардың басшылары, жоғары оқу орындарының, кәсіпорындар мен мекемелердің басшылары, аудан әкімдері қатысты.

Өрт қауіпті кезеңі және суға шомылу маусымына дайындық, жолдардағы қауіпсіздікті қамтамасыз ету, сыбайлас жемқорлыққа қарсы іс-қимыл және басқа да мәселелер қаралды.

ТЖД бастығының орынбасары Асқар Төлешев өз баяндамасында жыл басынан бері облыс аумағында дала және орман өрттері фактілері тіркелгенін атап өтті.

Осыған байланысты, жергілікті атқарушы органдарға бақылауды күшейту, өрттердің алдын алу және жою жөніндегі бұрын бекітілген жоспардың 2023 жылға арналған нұсқасында көзделген іс-шаралардың уақытылы орындалуына ерекше назар аудару  керектігі тапсырылды. Айта кетейік, ағымдағы жылы өңірде 320 өртке қарсы ерікті құралым құрылды, олар дала өрттерінің алдын алуға және сөндіруге тартылады.

Өрт сөндіру бекеттерін құру бойынша кезең-кезеңмен жоспарды іске асыру жалғасуда. Қазір 40 бекет жұмыс істейді, соның арқасында дала өрттерінің саны азайды.

«Орман және дала өрттерінің алдын алу, судағы жазатайым оқиғаларды болдырмау үшін халық арасында түсіндіру жұмыстарын жүргізу қажет. Аудан әкімдеріне барлық өртке қарсы жабдықтарды тексеру және тиісті жағдайға келтіруді, сондай-ақ коммуналдық жағажайларды құтқару жабдықтарымен қамтамасыз етуді тапсырамын. Шомылуға тыйым салынған жерлерде де жазатайым оқиғалардың алдын алу қатысты нақты шаралар қабылдау қажет», - деп атап өтті Ералы Тоғжанов.

Облыс аумағында тіркелген көлік құралдарының саны жыл сайын артып келеді. Былтырдың өзінде автомобильдер саны 6,5 мың бірлікке өскен. Бұл ретте өткен жылдың қорытындысы бойынша жол қозғалысы ережелерін бұзу саны 12%-ға төмендеді. Полиция департаменті бастығының міндетін атқарушы Қанат Әлиев жүргізушілердің тәртібін жақсартуға жолдардағы бейнекамералар, оның ішінде «Сергек» камералары санының артуы және рейдтік іс-шаралар өткізу ықпал еткенін баяндады.

Жол апаттарын азайту міндеті өзекті болып қала береді. Өңір басшысы бұл мәселеге ерекше назар аударуды тапсырды. Ералы Тоғжанов жол қозғалысы ережесін бұзғаны үшін берілетін айыппұлмен бұл мәселені шешу мүмкін емес екеніне сенімді. Жол қозғалысына қатысушыларға жағдай жасау, жол инфрақұрылымын жетілдіру қажет. Апат деңгейі жоғары учаскелерде қосымша қауіпсіздік шараларын іске асыру, жолдарды жөндеу жұмыстарын жеделдету, сондай-ақ тозбайтын, төзімді жаңа материалдармен жол таңбаларын салу мәселесін қарастыру тапсырылды.

Сонымен қатар, елді мекендердің көшелерінде, саябақтарында, скверлерінде қоғамдық қауіпсіздікті қамтамасыз ету мәселелері қаралды. Осы мақсатта ағымдағы жылы 3 000 бейнебақылау камерасы орнатылады. Олардың көпшілігі – Ақтөбеде.

Отырыс қорытындысы бойынша облыс әкімі бірқатар нақты тапсырмалар берді.

• 19.04.2023
• 149