Ақтоғай ауданына жасаған жұмыс сапарым бойынша қысқаша есеп

Бірінші айтар жақсы жаңалығымыз Ақтоғай ауылындағы барлық үйлер 2024 жылы орталық кәріз жүйесіне қосылатын болады. Өткен жылы бұл жоба қолға алынып, оған сәйкес негізгі коллектор салынды. Қазіргі уақытта тазарту қондырғылары орнатылуда.

Сонымен қатар аудан орталығының солтүстік-батысында жаңа шағын аудан салынуда. Қазір мұнда инженерлік инфрақұрылымның құрылысы жүріп жатыр. Биыл біз 16 пәтерлік екі үйді салуды бастаймыз. Осындай екі үй 2024 жылы да салынады.

Сапар барысында аудандық мәслихат депутаттарымен және аудан тұрғындарымен кездестім. Мен ауданда шешілмеген мәселелердің барын білемін. Олардың біреуі Ақтоғайдан Ақсу-Аюлыға дейінгі жол. Бұл мәселе бойынша жұмыс жасалуда. Өткен жылы жолдың 16 км жөнделсе, осы жылы тағы 50 км жол жөнделеді. Жөндеу жұмыстары 2024-2025 жылдары толығымен аяқталады. Сондай – ақ биыл Нарманбет-Айыртас жолын жөндеуге қаражат бөлінді.

Ұзақ уақыттан бері орын алып отырған мәселенің бірі электр энергиясымен тұрақты қамтамасыз ету. Бұл үшін біз электр желілерін аудандық коммуналдық меншікке бердік.

Сондай-ақ біз медициналық инфрақұрылымды жақсарту бойынша жұмыстарды жасап жатырмыз. Биыл Ақжарық ауылында фельдшерлік-акушерлік бекетті салуды жоспарлап отырмыз. Ал 2024 жылы мұндай ФАБ-тар тағы тоғыз елді-мекенде пайда болады.

Жұмыс сапары барысында Шабанбай би ауылдық округіне барып, ақсақалдармен кездестім. Олардың өтініші бойынша біз осында орналасқан мектептің шатыры мен қасбетін жөндеуді қолға аламыз. Қараусыз қалған «Арай» балалар лагерінде де болдым. Ол осы округтің табиғаты әсем жерінде орналасқан. Біз әріптестерімізбен оны қалпына келтірудің барлық мүмкіндіктерін қарастырамыз.

Келесі жолы Ақтоғай ауданының ірі елді-мекендері Шашубай мен Сарышағанда тұрғындармен кездесетін боламын. Кездесудің уақыты туралы қосымша хабарлаймын.

• 21.04.2023
• 223