Ералы Тоғжанов Хромтау ауданындағы өнеркәсіп кәсіпорындарының тыныс-тіршілігімен танысты

Облыс әкімі Ералы Тоғжанов Хромтау ауданына жұмыс сапары барысында бірқатар әлеуметтік және өндірістік нысандардың қызметімен танысты.

Дөң ауылында ангар типті дене шынықтыру-сауықтыру кешенінің құрылысы жалғасуда. Нысан биыл пайдалануға беріледі деп жоспарланған. Жобаның жалпы құны шамамен 305 миллион теңгені құрайды. Аудан әкімі Азамат Бекет құрылыс жұмыстары кестеден кешіктірілмей жұмыс жоспары бойынша жүргізіліп жатқанын, түйткілді мәселелердің жоқтығын жеткізді.

«Тау» агрофирмасы» күн сайын облыс тұрғындарына жақсы таныс Milky Land сауда белгісімен 15 тоннаға дейін ашытылған сүт өнімдерін шығарады.

Кәсіпорын мемлекеттің кәсіпкерлікті қолдау шараларын үнемі пайдаланады. Мысалы, кәсіпкерлікті дамыту жөніндегі ұлттық жоба аясында 2021-2022 жылдары 400 млн теңге сомаға айналым қаражатын толықтыруға қолдау көрсетілді, сондай-ақ инвестициялар мен субсидиялар тарту жөніндегі жобалары жүзеге асырылды. Облыс әкімі әлеуметтік маңызы бар азық-түлік тауарларын өндіретін кәсіпорындар тарапынан да тиісті міндеттемелерін орындау қажеттігін тілге тиек етті.

Ералы Тоғжанов өнім бағасын аз мөлшерде көтеру және оған толықтай негіз болуы тиіс екенін атап өтті.

«Хромтау кірпіш зауыты» ЖШС ұжымының алдына бірінші кезекте жергілікті нарықты өніммен қамтамасыз ету міндеті қойылды. Қазіргі уақытта өндірісте орнатылған еуропалық жабдық елдің басқа аймақтарында және ТМД елдерінде сұранысқа ие сапалы өнім шығаруға мүмкіндік береді. Зауыт жыл сайын 30 млн дана кірпіш өндіреді.

Облыс әкімі жұмыс сапарының соңында «Рахат+» кемпингіне барды. Жол бойындағы қызмет көрсету кешенінде қонақ үй, мейрамхана, техникалық қызмет көрсету станциясы жұмыс істейді, жыл соңына дейін асхана пайдалануға берілмек. Жобаға 180 млн теңге инвестиция салынған.

• 28.04.2023
• 178