Маңғыстауда Қазақстан халықтарының бірлігі күні атап өтілуде

1 мамыр- Қазақстан халықтарының бірлігі күні мерекесіне орай Ақтауда «Бейбітшілік - ел бірлігі» атты мерекелік іс-шара өтті, деп хабарлайды Маңғыстау облысы әкімінің баспасөз қызметі. 

Мерекеге өңір басшысы Нұрлан Ноғаев, сондай-ақ облыстағы этномәдени бірлестіктердің төрағалары мен өкілдері, қоғам белсенділері, қала тұрғындары қатысты. 

Мерекелік іс-шара аясында  этномәдени бірлестік өкілдері қонақтарды күлімдей қарсы алып, ұлттық тағамдарды ұсынды. Сондай-ақ ұлттық ойындар ойнады. 

Өңір басшысы Нұрлан Ноғаев барлық маңғыстаулықтарды Қазақстан халықтарының бірлігі күнімен құттықтады.

-Құрметті маңғыстаулықтар!
Қазақстан халықтарының бірлігі күнімен құттықтаймыз! 1 мамыр - елімізді мекен еткен түрлі ұлттар мен ұлыстарды бірлікке ұйыстыратын күн. Еліміздің әрбір азаматы ұлттық мәдени мұрамыз бен салт-дәстүрімізді дәріптеуге ат салысуы тиіс. Шын мәнінде ортақ отанымызда өмір сүретін әртүрлі ұлт өкілдері өзара татулық пен құрметті қадір тұтады. Халқымыз бейбітшілік пен бірлікте өмір сүріп келеді. Қазақстан - 130-дан астам ұлт пен ұлыс тұратын көпұлтты ел. Бекем бірлік пен ымыралы ынтымақтастық біз үшін бәрінен де қымбат құндылық. Қазақ халқында «Ынтымақ түбі - игілік, тірлік түбі - бірлік» деген мақал бар. Мемлекет басшысы Қасым-Жомарт Тоқаев өз сөзінде Тәуелсіздік жылдарында «әртүрліліктегі бірлік» қағидаты Қазақстанның мәдениеті мен дәстүрінің кең палитрасын біздің баға жетпес байлығымызға айналдырғанын атап өтті. Сондықтан, қоғамдағы тұрақтылық пен келісімді, рухани және мәдени құндылықтарды сақтау біздің міндетіміз болып қала береді. Сіздерді ең мейірімді және маңызды мерекелердің бірі – достық, түсіністік және келісім мерекесімен шын жүректен тағы да құттықтаймын. Осы мамыр күні баршаңызға зор денсаулық, амандық, бейбітшілік және үйімізге береке тілейміз! - деді облыс әкімі Нұрлан Ноғаев.

Іс-шара концерттік бағдарламамен жалғасты. Маңғыстау облысында тұратын түрлі этнос өкілдері ұлттық нақыштағы өнерлерін көрсетті. Айта кетейік, Маңғыстауда бүгінгі таңда 60-қа жуық ұлт, 20 этномәдени бірлестіктің өкілдері тұрады.

• 02.05.2023
• 155