Ақтауда Жамбыл Дүйсеновтың шығармашылық кеші өтті

3 мамыр күні Ақтауда  ақын Жамбыл Дүйсеновтың шығармашылық кеші өтті. Жеті жасында Қазақстанның Гиннес рекордтар Кітабына аты жазылған жас ақын Абай атындағы мәдени демалыс кешенінде көрерменді өнерімен сусындатты, - деп хабарлайды Маңғыстау облысы әкімінің баспасөз қызметі. 

Шығармашылық кешке  облыс әкімі Нұрлан Ноғаев, сондай-ақ зиялы қауым өкілдері, қала тұрғындары мен қонақтары, өнер сүйер қауым қатысып, ақынның өнеріне деген ыстық ықыласын білдірді. 

2010 жылы есімі елге танылған бала Жамбыл көптеген поэтикалық конкурстардың жеңімпазы. Әдебиет танушылардың сөзінше, оның өлеңдерінің басым көпшілігі патриоттық тақырыптарда. 

Жамбыл - Алматы мектеп лицейінің түлегі. Әкесі - Алматы облысындағы Жамбыл ауданының тумасы, ал анасы Кәмшат Қарасаздан. 

Ақын қазіргі уақытта 200-ден астам туынды жазып, үш кітап басып үлгерген. Ең алғашқы кітабы ақынның небәрі жеті жасында жарық көрген. Осы жасында да Қазақстанның Гиннес рекортар Кітабына  «ең жас ақын» ретінде кірген. 

Кеш соңында аймақ басшысы Нұрлан Ноғаев Жамбыл Дүйсеновтың жас та болса, қазақ поэзиясының дамуына қосқан үлесі елеулі екенін ескеріп,  алда шығармашылығына шабыт тіледі.

-Жамбыл бала кезінен отанға деген ыстық махабаты бар өлеңдерімен ерекшеленді. Онда біздің тіл, әдет-ғұрып, дәстүрлеріміз сынды ұлттық құндылықтарымыз дәріптеледі. Болар елдің баласы он бесінде баспын дер, жас болсада шығармаларында ерекше лирикалық тереңдік пен мазмұн бар. Алдағы уақытты Жамбылды үлкен шығармашылық белестер күтіп тұрғанына сенемін, -  деді Нұрлан Ноғаев.

• 05.05.2023
• 162