Ақтөбеде шахмат академиясы ашылуы мүмкін

Ақтөбеде болашақ шахматшыларды тәрбиелеуге бағытталған академия ашылуы ықтимал. Бүгін облыс әкімі Оңдасын Оразалин Жансая Әбдімәлік атындағы шахмат академиясының президенті Данияр Ашировпен кездесті. ҚР еңбек сіңірген жаттықтырушысы мен аймақ басшысы болашақта Ақтөбеден бой көтеруі мүмкін шахмат академиясының жоспарлары мен мақсаттарын талқылады. Бес дүркін әлем чемпионы Жансая Әбдімәлік атындағы шахмат академиясы алғаш рет 2014 жылы Алматы қаласында ашылған болатын. «BRNO OPEN 2013» Халықаралық турнирінің жеңімпазы, он төрт жасында әйел гроссмейстері атанған Жансая Әбдімәлік атындағы академияда 6 жыл ішінде 4000-нан астам бала білім алған, сонымен қатар Қазақстан шахматы тарихында ең жас болып табылатын әлем және Азия чемпионы Дінмұхаммед Төлендиновты тәрбиеледі. Оңдасын Оразалин болашақ жас буынды спорт пен білімге шыңдау мақсатында аталған ұсынысқа қолдау білдірді. Академияның ашылуына «Даму» кәсіпкерлікті қолдау қоры» ықпал етпек. Облыс әкімі Оңдасын Оразалин қала басшысы мен білім басқармасының басшысына аталған ұсыныстың жүзеге асуына жан-жақты қолдау көрсетуді тапсырды.

• 09.12.2020
• 297