Ақтау және Жаңаөзен қалаларында Қазақстанға еңбегі сіңген әртіс Нұрлан Өнербаевтың кеші өтті

Абай атындағы мәдени демалыс кешенінде әнші, Қазақстанның еңбек сіңірген әртісі Нұрлан Өнербаевтың «Айтылмаған бір әнім бар»  атты жеке шығармашылық кеші өтті.

Қазақ сахнасының саңлағы, эстрадалық әнші, Қазақстанның еңбек сіңірген қайраткері Нұрлан Өнербаев Ақтау және Жаңаөзен халқының алдында өнер көрсетті. 

Республикалық турне барысында ұйымдастырылған концерт көптеген көрерменнің жүрегінен орын тауып, әнмен қуантты. 

Нұрлан Өнербаев бірнеше жыл бұрын қоңыр даусымен және әсем әуендерімен халықтың жүрегін жаулаған болатын керемет әнші.

Ол сондай-ақ, 11 жыл бойы театр сахнасында өнер көрсеткен керемет актер. Оның Ш.Айтматовтың «Жер Ана» қойылымындағы Жанақ рөлі, Ғ. Мүсіреповтың «Амангелді» шығармасындағы Қалиды сомдауы, Ә. Нұрпейісовтың «Қан мен Тер» спектакліндегі рөлдері әлі де болса көптің жадында. 

Сонымен қатар, әнші осы уақытқа дейін 70-тен астам әннің алғашқы орындаушысы болған. Қазір олардың көп бөлігін жас әншілер орындап жүр.

Бүгінде әртіс Қазақстанның өзге өңірлерінде өнер көрсетіп, гастролдік сапар бойынша былтырдан бері 12 қаланы аралап шыққан. 

-Нұрлан Өнербаевты нағыз халық әншісі деп айтуға толық негіз бар. Өйткені, ол керемет даусымен тек елімізде ғана емес, қазақ әндерін әлем сахналарында шырқаған талант. Нұрлан Өнербаев өз шығармашылығымен біздің ұлттық өнерімізді сақтауға және дамытуға өлшеусіз үлес қосып келе жатқан халықтың біртума ұлы, - деді Нұрлан Ноғаев.

• 10.05.2023
• 136