Түркиялық инвесторлар «Ақтау теңіз порты» арнайы экономикалық аймағында мыстан жасалған сым өндіруге мүдделі

Өңір басшысы Нұрлан Ноғаев Түркияның «Er-Bakir» ірі зауытының өкілдерімен кездесті. Компания жылына 200 мың тонна мыстан жасалған сым шығаратын қуаттылығы жоғары өндіруші болып табылады, деп хабарлайды Маңғыстау облысы әкімінің баспасөз қызметі. 

«Er-Bakir» компаниясы Маңғыстау облысында мыстан жасалған сым өндіру жөніндегі жобаны іске асыру мүмкіндігін қарастыруда. Бұл туралы Нұрлан Ноғаевтың түрік делегациясымен кездесуі барысында белгілі болды. 
Басқосуда «Ақтау теңіз порты» арнайы экономикалық аймағы жобаның болжамды орны ретінде қарастырыла отырып, Маңғыстау облысындағы мыс сым өндіру жобасының іске асырылу мүмкіндіктері талқыланды.

Өңір басшысы Нұрлан Ноғаев Маңғыстау облысының инвестициялық жобаларды іске асыру үшін үлкен әлеуетке ие екенін атап өтті.
- Мемлекет Басшысы Қасым-Жомарт Тоқаевтың тапсырмасына сәйкес, экономиканың өсуі мен әртараптануының негізгі факторларының бірі инвестицияларды тарта отырып, жаңа өндіріс орындарын құру. Соңғы мәліметтер бойынша, Маңғыстау облысында түрік капиталының қатысуымен экономиканың түрлі салаларында 86 кәсіпорын тіркелген. Екіжақты инвестициялық ынтымақтастық ағымдағы кезеңде жоғары өсім көрсетіп отыр. Біздің бүгінгі кездесуіміз Қазақстан мен Түркия арасындағы сауда және инвестициялық байланыстарды одан әрі нығайтады деп ойлаймын, - деді Нұрлан Ноғаев.  

Айта кетейік, Маңғыстау облысының Түркия Республикасымен сыртқы сауда айналымы 2022 жылы 73,7 млн.долларды құраса, 2023 жылдың 1 тоқсанында 6,6 млн. АҚШ доллар көрсеткішіне жетіп отыр. Оның ішінде экспорт көлемі – 2,5 млн АҚШ долларын, ал импорт-4,1 млн. АҚШ долларын құрайды. 
Экспортқа шикі мұнай өнімдері мен зергерлік бұйымдар, қара металдардың қалдықтары мен сынықтары, өңделмеген алюминий кірсе, импортқа: көкөністер мен жемістер, минералдар, фтор, хлор, бром, бояулар мен лактар кіреді.

• 16.05.2023
• 168