2023 жылғы жазғы айларына арналған Қазақстан аумағы бойынша маусымдық ауа райы болжамы

Маусымдық болжам жылына алты  рет жасалады: жылы жарты жылдыққа арналған 1 болжам және суық жарты жылдыққа арналған 1 болжам, олар Қазақстан Республикасының 17 облысы бойынша қыс, көктем, жаз және күз маусымдарына арналған 4 тоқсандық болжаммен нақтыланатын болады:

• 15 ақпанда көктем айларына (наурыз-мамыр);
• 15 наурызда жылы кезеңге (сәуір-қазан);
• 15 мамырда жаз айларына (маусым-тамыз);
• 15 тамызда күз айларына (қыркүйек-қараша);
• 15 қазанда суық кезеңге (қараша-наурыз);
• 15 қарашада қыс айларына (желтоқсан-ақпан).

Жаз – таңғажайып, әдемі және жарқын жыл мезгілдерінің бірі.     

Консультативті болжамға сәйкес 2023 жылы жазда республиканың басым бөлігінде температуралық фон нормадан жоғары, тек солтүстік аймақтарда норма шамасында күтіледі. Республиканың солтүстік-батыс және солтүстік-шығыс жартысында фронтальды бөліктердің өтуімен және Солтүстік теңіз ауданынан келетін суықтың әсерінен ауа температурасының                                  күндіз +30+38°С-ден +15+20°С-ге дейін ауытқуы мүмкін, ал еліміздің оңтүстік-батыс жартысында жекелеген күндері термометр бағаны +40+45°С-ге дейін жоғарылайды деп болжанады. Ыстық күндер нөсер жаңбырлы қатты желмен, найзағайлы салқын күндермен ауысып отырады.

Жаздың алғашқы айы – маусым республиканың басым бөлігінде ыстық болады деп күтіледі, орташа ауа температурасы республиканың басым бөлігінде нормадан 1-2° жоғары, еліміздің солтүстігінде, солтүстік-шығысында, шығысында және оңтүстік-шығысында норма шамасында болжанады (норма: республиканың басым бөлігінде +18+23°С, еліміздің оңтүстік-батыс жартысында +24+28°С, республиканың оңтүстік-шығыс, шығысындағы таулы аймақтарында +7+17°С).

Шілде – жаздың ортасы, республиканың басым бөлігінде орташа ауа температурасы норма шамасында, Казақстанның оңтүстік аймақтарында нормадан 1° жоғары күтіледі (норма: республиканың басым бөлігінде +18+24°С, еліміздің оңтүстік жартысында +25+30°С, республиканың оңтүстік-шығыс, шығысындағы таулы аймақтарында +9+17°С).

Жаздың соңғы айы – тамыз еліміздің басым бөлігінде ыстық болады деп күтіледі, орташа ауа температурасы нормадан 1-2° жоғары, тек республиканың солтүстік-батыс жартысында норма шамасында болжанады (норма: республиканың басым бөлігінде +20+28°С, еліміздің солтүстік-шығыс жартысында +16+19°С, республиканың оңтүстік-шығыс, шығысындағы таулы аймақтарында +11+15°С).

Жауын-шашынға келетін болсақ, жалпы республиканың басым аймақтарында жазда жауын-шашынның жетіспеушілігі байқалады. Жауын-шашын мөлшері климаттық норма шамасында күтіледі:

маусым айында – солтүстік-батыста, солтүстік-шығыста, оңтүстік-шығыста және оңтүстіктің таулы аймақтарында (норма: республиканың басым аймағында 25-49 мм, еліміздің оңтүстік-батыс жартысында 1,7-24 мм, солтүстіктің жекелеген аймақтарында және республиканың оңтүстік-шығыс, шығысындағы таулы аймақтарында 51-155 мм);

шілде айында – республиканың солтүстік-батыс бөлігінде (норма: республиканың басым аймағында 25-49 мм, еліміздің оңтүстік-батыс жартысында         1,4-24 мм, солтүстік-батыс, солтүстік, орталық, шығыстың жекелеген аймақтарында және республиканың оңтүстік-шығыс, шығысындағы таулы аймақтарында 50-84 мм);

тамыз айында – Казақстанның солүстік, шығыс, оңтүстік-шығыс аудандарында (норма: республиканың басым аймағында 1-24 мм, еліміздің солтүстік-батыс, шығыс, оңтүстік-шығысында 25-49 мм, республиканың солтүстік, шығыс, оңтүстік-шығысының жекелеген аймақтарында 50-63 мм).

• 17.05.2023
• 91