Маңғыстауда Н. Жантөрин атындағы музыкалық драма театрының 20 жылдығы аясында ғылыми-шығармашылық конференция өтті

Ақтауда Н. Жантөрин атындағы музыкалық-драма театрының мерейтойына арналған «Жантөринше Жаңғыру!» атты ғылыми-шығармашылық конференция өтті, деп хабарлайды Маңғыстау облысы әкімінің баспасөз қызметі. 

Республикалық ғылыми-шығармашылық конференцияда театр зерттеушілері мен сыншылары, режиссерлер мен драматургтер, сценографтар мен мәдениеттанушылар және әр саладағы өнертанушылар бас қосты. 

Конференцияда Н. Жантөрин атындағы театрдың жеткен жетістіктеріне ден қойылды. Жиырма жыл уақыт ішінде театр көрермендердің ерекше ықыласына бөленген, елдегі жетекші театрдың біріне айналып үлгерген өнер ордасы. Халықаралық фестивальдарда Қазақстанның атынан табысты да, абыройлы өнер көрсетіп жүрген үлкен шығармашылық ұжым. 

Осындай атаулы күнде театр ұжымын Маңғыстау облысының әкімі Нұрлан Ноғаев та құттықтады. 

- Н. Жантөрин атындағы театрдың 20 жылдығына орай өткізіліп отырған конференция театр өнерін дамытудың өзекті мәселелерін талқылауға арналған кәсіби пікірталас алаңына айналды. Біздің өңірге көрнекті қазақ кино және театр қайраткері - Асанәлі Әшімов, театр сыншысы Еркін Жуасбек, Темірбек Жүргенов атындағы Қазақ Ұлттық Өнер академиясының профессоры - Анар Еркебай және Қазақстанның еңбек сіңірген қайраткерлері мен театр директорлары келді. 

Театрдың мерейтойына орай ауқымды ғылыми симпозиум ұйымдастырылып, оның аясында көптеген мәселелерді талқылауға мүмкіндік туып отыр. Н.Жантөрин атындағы музыкалық-драма театрының ұжымына туған өлке Маңғыстаудағы театр өнерін дамыту жолындағы көпжылдық тынымсыз еңбегі үшін ризашылығымды білдіремін. Олар өңіріміздің өскелең ұрпағын тәрбиелеуде аса маңызды әлеуметтік миссияны орындап жүр, - деді Нұрлан Ноғаев.

• 17.05.2023
• 179