ҚР ҰЭМ-де Қазақстан мен Иордания арасындағы сауда-экономикалық ынтымақтастық мәселелері талқыланды

Бүгін Астанада Ұлттық экономика министрі Әлібек Қуантыров Иордания Хашимит Корольдігінің ҚР-дағы Төтенше және Өкілетті елшісі Юсуф Абдулғанимен кездесу өткізді.

Кездесу барысында Қазақстан-Иордания үкіметаралық комиссиясының 5-ші отырысын ұйымдастыру және өткізу мәселелері талқыланды. ҚР Ұлттық экономика министрі мен Иорданияның өнеркәсіп, сауда және жабдықтау министрі Комиссияның тең төрағалары болып табылады. Тараптар екіжақты экономикалық ынтымақтастықты, оның ішінде өзара сауданы арттыру қажеттігін атап өтті.

Сонымен қатар, инвестиция тарту және қосарланған салық салуды жоюға қатысты екі ел арасында шарттық-құқықтық базаны кеңейту мәселелері қаралды.

Кездесу қорытындысы бойынша министр Иорданияның ресми тұлғаларын 8-9 маусымда Елордада өтетін Астана халықаралық форумына шақырды. Сондай-ақ, ол шетел дипломатын 25 мамырда атап өтілетін Иорданияның Тәуелсіздік күнімен құттықтады. Өз кезегінде Юсуф Абдулғани мырза Иордания Хашимит Корольдігі Қазақстанмен өзара тиімді ынтымақтастықты одан әрі нығайтуға мүдделі екенін атап өтті.

• 26.05.2023
• 176