Ермек Маржықпаев Зеренді ауданының тұрғындарымен кезекті кездесуді өткізді

Зеренді ауданының тұрғындарымен жыл сайынғы есептік кездесуде Ақмола облысының әкімі Ермек Маржықпаев атқарылған жұмыстар және жалпы ауданның даму перспективалары туралы айтып берді.

Аудан бойынша ағымдағы жылдың бірінші тоқсанының қорытындысы бойынша екі негізгі әлеуметтік-экономикалық көрсеткіш орындалмады - ауыл шаруашылығын дамыту және инвестициялар тарту.

Облыс әкімі бұл көрсеткіштер жұмыстың негізгі екенін айтып, жағдайды жақсарту үшін барлық күш-жігерді жұмсау қажеттігін атап өтті.

Өңірдің ауыл шаруашылығы саласын дамытуға жергілікті фермерлер де елеулі үлес қосуда. 1 - тоқсанның қорытындысы бойынша ауыл шаруашылығы өнімінің көлемі 7 млрд. теңгені құрады.
500 – ге жуық ірі қара мал сатып алып, 3 ет және 2 сүт-тауар фермасын құру жоспарлануда.

Инфрақұрылымды дамыту бойынша үлкен жұмыстар жүргізілуде. 2022 жылы ауданда 76 шақырым жол жөнделді. Бәйтерек, Игілік, Қонысбай ауылдарындағы кентішілік жолдарға, Қызылсай – Қызылағаш, Жылымды, Ортақ, Садовое, Алексеевка, Зеренді, Красный Кордон, Мәлік Ғабдуллин жол учаскесіне орташа жөндеу жұмыстары жүргізілді.

Сумен жабдықтау саласында 2025 жылға дейін 20 елді мекенде сумен жабдықтау желілерін салу, 11 ауылда біріктірілген блок модульдерді орнату жоспарлануда. Алексеевка ауылында су құбыры желілерін қайта жаңарту бойынша жобаны іске асыру басталды.

Электр энергиясын беру сапасын жақсарту үшін 16 км электр беру желілерін салу жоспарлануда. Сондай-ақ, Азат, Өзен, Ортағаш, Қарашілік, Қызылегіс, Игілік, Красный Кордон, Үлгілі, Алексеевка ауылдарында көше жарығы жөнделеді.

Әлеуметтік салада кадрларды тарту үшін Зеренді ауылында медицина қызметкерлері үшін 15 пәтер сатып алуға қаражат бөлінді. Денсаулық сақтау нысандарын медициналық жабдықтармен жабдықтау артты. Бірлестік және Ершовка ауылдарында екі дәрігерлік амбулатория салуға жобалық құжаттаманы әзірлеуге қаражат көзделген.

Ауданның үш мектебінде жөндеу жұмыстары жүргізіледі. Садовое, Васильковка, Бәйтерек, Мәлік Ғабдуллин ауылдарындағы мектептер үшін блоктық-модульдік қазандықтар сатып алынды.

Өткен жылы Зеренді аудандық ауруханасының бірнеше бөлімшелері ағымдағы жөндеумен қамтылды.

Қызылтан, Еленовка, Кеңөткел, Айдабол ауылдарының клубтарының ғимараттары жаңартылды.

Спорт саласында Айдабол кентінде шаңғы роликті трассасын салу жоспарлануда. Зеренді спорт мектебінің базасын салу бойынша жобаны әзірлеу аяқталуда.

Кездесуде өңір басшысына жолдарды жөндеу, медициналық кадрлар мен жабдықтардың, пай және жайылымдық жерлердің жетіспеушілігі туралы сұрақтар қойылды.

«Зеренді ауданы ішкі туризмді дамыту үшін үлкен резервке ие. Зеренді аймағы  республикалық деңгейдегі үздік туристік аумақтар тізбесіне енгізілген. Сондықтан тиімді жұмысты қамтамасыз ету үшін аудан әкімдігінің басшылығы мен салалық мемлекеттік органдар туризм саласын дамыту үшін инвестиция тартып, инженерлік инфрақұрылым мен курорттық аймақты абаттандыру жобаларын іске асыруды жалғастыруы қажет", - деп түйіндеді облыс әкімі.

Іс-шарадан кейін азаматтарды жеке мәселелері бойынша қабылдау өтті.

• 29.05.2023
• 97