ҰЭМ басшысы Біріккен ұлттар ұйымы жанындағы Халықаралық сауда орталығының Атқарушы директорымен кездесті

​Бүгін Алматыда «Еуропалық Одақ – Орталық Азия» II Экономикалық форумы алаңында ҚР Ұлттық экономика министрі Әлібек Қуантыров БҰҰ жанындағы Халықаралық сауда орталығының атқарушы директоры Памела Коук-Хамильтонмен кездесу өткізді.

Тараптар Еуроодақ елдерімен экономикалық ынтымақтастықты одан әрі нығайту мәселелерін, «жасыл» бастамалар және бірлескен жобаларды іске асыру барысын талқылады.

«Қазақстан Еуропалық Одақпен көпжақты сауда-экономикалық ынтымақтастықты кеңейтуге зор мән береді. Қазақстан мен ЕО елдері арасындағы сауда көлемі өткен жылы рекордтық деңгейге жетті. 38%-ға артып, $40 млрд. құрады», - деді ҰЭМ басшысы.​

2022 жыл

Қазақстаннан Еуродақ елдеріне экспорт $32,4 млрд. құрады

ЕО-дан елімізге импорт $7,6 млрд.

Ағымдағы жылдың алғашқы 3 айында өзара сауда көлемі 12,5%-ға артып, $10,2 млрд. құрады

Министр атап өткендей, қазіргі уақытта Қазақстан Еуроодақ елдеріне экспортты 175 тауар түріне дейін жеткізуді жоспарлап отыр. ​Бұл жағдайда тауар айналымы тағы $2 млрд. артады.

Сондай-ақ, тараптар Орталық Азия елдерінде Халықаралық сауда орталығы іске асырып жатқан Ready4Trade-Central Asia жобасы экономикалық байланыстарды нығайтуға ықпал ететініне сенім білдірді.

Бұдан басқа Қазақстанның «жасыл» бастамалары, қабылданған 2060 жылға дейінгі көміртегі бейтараптығына қол жеткізу Стратегиясының негізгі бағыттары талқыланды.

«Осы жаңашылдықтар заманауи талаптарға сәйкес келеді, зиянды шығарындыларды азайтуға және экономиканың осал секторларын климаттың өзгеруіне бейімдеуге мүмкіндік береді», - деді Ә.Қуантыров.

​Өз кезегінде, П.Коук-Хамильтон ханым Қазақстан мен Еуроодақ арасындағы ынтымақтастыққа жоғары баға беріп, еліміздің өңірдегі бірқатар халықаралық бастамалар бойынша көшбасшы ретіндегі рөлін атап өтті. Кездесу қорытындысы бойынша тараптар барлық маңызды бағыттар бойынша өзара іс-қимылды жандандыруға келісті.

• 30.05.2023
• 99