Алматыда Ұлттық экономика министрі «Еуропалық Одақ – Орталық Азия» II Экономикалық форумының ресми бөлігін ашты

Әлібек Қуантыров өз сөзінде делегаттарға белсенді қатысқаны үшін алғысын білдіріп, оларға жемісті жұмыс тіледі.

Оның сөзінше, Орталық Азия - бірегей мүмкіндіктер мен зор әлеуеті бар аймақ. Бүгінгі таңда Еуропалық Одақ Қазақстанның ірі сауда және инвестициялық серіктесі болып табылады. ҚР-дың елдің сыртқы саудасының 30%-ы Еуроодақтың үлесіне тиесілі.

«Қазақстанда қолайлы инвестициялық ахуал жасалған. Біздің мақсатымыз – тікелей шетелдік инвестиция көлемін жылына кемінде $25 млрд. ұлғайту. Сонымен қатар, өткен жылы біз бұл көрсеткіштен астық. ТШИ көлемі $28 млрд-ты құрады», - деді министр.

«Орталық Азия елдеріндегі іскерлік ахуалды жақсарту» атты панельдік сессиясында Ә.Қуантыров Қазақстанның 2026 жылға дейінгі инвестициялық саясатының тұжырымдамасы қабылданғанын атап өтті. Бизнесті ашу және жүргізу рәсімдері жеңілдетіліп, 76 елмен визасыз режим орнатылған. Бизнесті жауапты жүргізу стандарттары мен ЭЫДҰ басшылық қағидаттарын ілгерілету үшін ҚР ҰЭМ жанынан Ұлттық байланыс орталығы құрылды.

«Жалпы, бізде әлемде қолданылатын инвестиция тартудың барлық қажетті құралдары бар», - деді Ә.Қуантыров.

А.ж. Үкімет алдында тұрған маңызды міндеттердің бірі – экономикалық өсуді кемінде 4% деңгейінде қамтамасыз ету. Айта кету керек, биылғы 4 айдың қорытындысы бойынша экономиканың өсуі 5%-құрады.

Шағын және орта кәсіпкерлікті дамытуды ынталандыру үшін жаңа реттеуші саясат іске асырылуда. Бұл тексерулер санын едәуір қысқартуға мүмкіндік береді. 10 000 қажетсіз бизнес талаптары жойылады. Ағымдағы жылғы 1 сәуірдегі жағдай бойынша жұмыс істеп тұрған ШОБ субъектілерінің саны 1,9 млн-ға жетті.

Жыл сайын отандық нарықтың шетелдік инвестициялар үшін тартымдылығы өсуде.

«2022 жылы 24 шетелдік компания Қазақстанға көшті. Атап айтқанда, Honeywell, InDriver, Weir Minerals, Ural Motorcycles, Fortescue, TikTok, Koppert, Emerson және т.б. Қазіргі уақытта Үкімет тағы 43 компанияны орналастыру бойынша нақты келіссөздер жүргізуде», - деп хабарлады ведомство басшысы. ​

Сондай-ақ, панельдік сессия барысында қатысушылар қазіргі жағдайдағы ынтымақтастық перспективалары туралы баяндады. ЕО мен Орталық Азия арасындағы экономикалық байланыстарды нығайтуға дайын екендіктерін білдірді.

Сессия қатысушылары:

Петер Сийарто – Мажарстанның Сыртқы істер және сыртқы сауда министрі

Алексис Вафиадис - Кипр Республикасының көлік, коммуникация және қоғамдық жұмыстар министрі

Илхом Норкулов - Өзбекстанның экономика және қаржы министрінің орынбасары

Луис Скайнер – EUROUZ, Dentons әріптесі және басқарма мүшесі

Жалын Жээналиев - Қырғыз Республикасы Президенті жанындағы Ұлттық инвестициялар агенттігі директорының орынбасары

• 30.05.2023
• 152