Өңірлік Азаматтық Форумдар өз жұмысын бастады

25 мамырда азаматтық қоғам мен мемлекет диалогын дамытудың негізгі алаңдарының бірі болып табылатын Қазақстанның кезекті ХІ Азаматтық форумы аясында Талдықорған қаласында Жетісу облысының «Жергілікті өзін-өзі басқаруды дамыту мәселелері мен перспективалары» тақырыбында өңірлік Азаматтық форумы өз жұмысын бастады.

Өңірлік Форум жұмысына еліміздің барлық 17 облыстары мен Астана, Алматы, Шымкент қалаларынан, республикалық, облыстық ҮЕҰ-дан, саяси партиялардан, діни бірлестіктер мен бизнес өкілдері, әр түрлі деңгейдегі депутаттар, жалпы 200-ге жуық адам қатысуда.

Бірінші күні секциялық отырыстар, семинарлар, Жетісу облысының ҮЕҰ-мен өзара іс-қимыл және ынтымақтастық жөніндегі Кеңесінің кеңейтілген отырысы өткізілді.

Сонымен қатар, Форумға қатысушылар «OCHAQ тұрақты даму орталығы» ҚБ жұмысымен танысты. Бұл ҮЕҰ, оның қызметі Көксу ауданы Жарлыөзек ауылының экологиялық, экономикалық және әлеуметтік мәселелерін шешуге, ауыл тұрғындарын тұрақты даму мүддесінде кешенді қолдауға бағытталған.

Бұдан басқа, Форумның екінші күнінде 26 мамыр күні Пленарлық отырыстың өткізілуі жоспарланған. Соған қоса, секциялық алаңдарды өткізуден басқа, пікірталас алаңдары, үздік әлеуметтік жобалар көрмесі мен серіктестік келісімдер өткізіледі.

Жетісу облысында бастау алған Өңірлік Азаматтық форум жұмысы әрі қарай еліміздің басқа өңірлерде де өз жалғасын табатын болады.

• 31.05.2023
• 153