"Коммуналдық қызметтерге тарифтердің негізсіз өсуі болмайды" - ҚР ҰЭМ ТМРК

Қызыл аймақтағы монополистердің 100% - ға жуығы инвестицияларды ұлғайтуға өтініш берді.

ҚР ҰЭМ Табиғи монополияларды реттеу комитеті «Тарифті инвестицияларға айырбастау» бағдарламасын іске асыру шеңберінде инвестициялар мен жөндеу жұмыстарының сомасын ұлғайту үшін инвестициялық бағдарламаларды бекітуге табиғи монополиялар субъектілерінің өтінімдерін қарау бөлігінде жұмыс жүргізеді.

Бүгін ҚР ҰЭМ ТМРК аумақтық департаменттерінің қарауында тозу деңгейі жоғары табиғи монополиялар субъектілерінің 71 өтінімі бар. Ағымдағы айдың соңына дейін ТМС-тің тағы 5 өтінімі түседі деп күтілуде.

Салалар бойынша жағдай келесідей:

жылумен жабдықтау: 21 өтінім түсті (10 өңірден: Алматы қ., ШҚО, СҚО, Ақмола, Қарағанды, Қостанай, Павлодар, Маңғыстау, Жамбыл облыстары және Абай облысы), 2 өтінім - күту сатысында (Павлодар облысы, Жетісу облысы)

электрмен жабдықтау: 16 өтінім келіп түсті (13 өңірден: Ақмола, Ақтөбе, Маңғыстау, Қарағанды, Қостанай облыстары, Жетісу облысы, Алматы қаласы және Алматы облысы, Жамбыл, БҚО, СҚО, Абай облысы және ШҚО)

сумен жабдықтау: 13 өтінім түсті (8 өңірден: Ақмола, Павлодар, Қостанай, Қарағанды, Жамбыл облыстары, ШҚО, Абай облысы, Ұлытау облысы), 1 өтінім - күту сатысында (Алматы облысы)

су бұру: 21 өтінім түсті (11 өңірден: Ақмола, Павлодар, Қостанай, Қарағанды, Маңғыстау, Ақтөбе облыстары, ШҚО, БҚО, Абай облысы және Шымкент қ.), 2 өтінім - күту сатысында (Түркістан, Алматы облыстары)

Инвестициялық іс-шаралар, ең алдымен, жергілікті атқарушы органдармен және салалық мемлекеттік органдармен (Энергетика министрлігі, ИИДМ, Экология министрлігі) келісілетінін атап өткен жөн. ЖАО мен салалық органдар техникалық бөлімді қарайды, яғни жөндеу жұмыстарының басымдылығын, жабдықты ауыстыру қажеттілігін, тозу деңгейін (инженерлік инфрақұрылымның нақты жай-күйі және т.б.) айқындайды.

ҚР ҰЭМ ТМРК аумақтық департаменттерінің міндеті осы іс-шаралардың экономикалық орындылығын талдау болып табылады, өйткені бұл тарифтің өзін қалыптастырады. Әрбір өтінімді ҚР ҰЭМ ТМРК аумақтық департаменттері мұқият қарайды және талдайды .

Белгілі бір тарифті өзгерту туралы шешім қабылдамас бұрын тұтынушылардың, жұртшылық өкілдерінің, мәслихат депутаттарының, «Атамекен» ҰКП және БАҚ қатысуымен Жария тыңдаулар өткізіледі, олардың қорытындысы бойынша тарифтерді қалыптастыру кезінде пікірлер ескеріледі. Тарифтердің қалыптасуына әр өңірдің әлеуметтік-экономикалық жағдайы да әсер етеді, тарифтердің негізсіз өсуіне жол берілмейді, тариф халық үшін әділ және қолайлы болады.

ҚР ҰЭМ жаңа тарифтер тұтынушылардың қаражаты есебінен ғана емес, сонымен қатар мемлекеттік бюджет пен монополистердің есебінен де қалыптасатынын еске салады.

• 31.05.2023
• 141