Маңғыстау облысында саяси қуғын сүргін құрбандарын еске алды

Ақтауда Жалау Мыңбайұлы ескерткішіне гүл шоқтарын қою рәсімі өтті. Салтанатты шараға өңір басшысы Нұрлан Ноғаев, қоғам қайраткерлері, саяси қуғын-сүргін құрбандарының туыстары мен ұрпақтары, жастар және қала тұрғындары қатысты, деп хабарлайды Маңғыстау облысы әкімінің баспасөз қызметі.

Қатысушылар қуғын-сүргінге ұшыраған жандарды бір минут үнсіздікпен еске алған соң, Жалау Мыңбайұлы ескерткішіне гүл шоқтарын қойды. Еске алу шарасы саяси қуғын-сүргін құрбандарын толық ақтап алу жөніндегі облыстық комиссияның отырысымен жалғасты. Жиын барысында саяси қуғын-сүргін құрбандарын зерттеуге үлес қосқан азаматтар Маңғыстау облысы әкімінің атынан алғыс хаттармен марапатталды.

Отырыста қуғын-сүргін құрбандарын толық ақтау мәселелері жөніндегі комиссия мен жұмыс топтарының есебі тыңдалды. Сонымен қатар, «Ашаршылық пен қуғын-сүргін құрбандары», «Депортация», «Қуғын-сүргін құрбандары ұрпақтарының сұхбаты» атты арнайы деректі фильмдер көрсетілді.

- Мемлекет Басшысы Қасым-Жомарт Тоқаев 2020 жылғы 24 қарашада «Саяси қуғын-сүргін құрбандарын толық ақтау жөніндегі мемлекеттік комиссия құру туралы» тарихи Жарлыққа қол қойып, халықаралық стандарттар негізінде саяси қуғын-сүргін құрбандарына қатысты тарихи әділдікті қалпына келтіру және бүгінгі халық пен ұрпақтарға олардың адал есімдерін қайтару міндетін қойды. Бұл - қазіргі ұрпақ алдындағы үлкен жауапкершілік пен игі борыш, - деді облыс әкімі Нұрлан Ноғаев.

Ресми деректерге сәйкес, Маңғыстау облысында 700-ден астам адам қуғын-сүргінге ұшыраған. Ақтауда Кеңес дәуірінің қайраткерлері, әрі жалған жалаға ұшыраған Жалау Мыңбайұлына, Тобанияз Әлниязұлына ескерткіштер орнатылған. Тарихшылардың мәліметінше, қуғын-сүргін кезінде 22 мыңнан астам адам атылып, 1930 жылдардың басында қазақ даласында кем дегенде бір жарым миллион адам ашаршылықтың құрбаны болған.

• 02.06.2023
• 166