Қарағанды облысының полиция департаменті киберқылмысқа қарсы күрес жөніндегі «Киберпол» бөлімін құрды

Оның құрамына тәжірибелі тергеушілер, жедел уәкілдер мен криминалистер, сондай-ақ ең бастысы IT саласының сарапшылары мен Б. Бейсенов атындағы ІІМ Қарағанды академиясының мамандары кірді.

Интернет-алаяқтардың өте жедел әрекет ететіндігін ескере отырып, бөлімшенің жұмысын тиімді ету үшін қажетті шаралар қабылданды. Осылайша, жәбірленушілердің барлық өтініштері «бір терезе» қағидаты бойынша қабылданып, осы арқылы 3-4 күн үнемделіп, тергеу әрекеттерін бірден бастауға мүмкіндік туады. Сонымен қатар, бөлімше цифрлық зертханамен жабдықталған, онда мамандар гаджеттерді мұқият тексеріп, интернет-алаяқтар қолданатын бағдарламаларды анықтайды. Бұл алдын алу жұмыстарын жүргізуге және қолданушыларға қажетті бағдарламалар мен мобильді қосымшаларды орнату ережелері бойынша кеңестерді әзірлеуге жағдай туғызады.

Бөлімше өз жұмысын енді бастап жатқанына қарамастан қазірдің өзінде нәтижелер баршылық. Бүгінде күдікті алаяқтардың екі тобы құрықталып, тиісті шаралар іске асырылуда. Әрине, бұл тек бастамасы ғана. Өз тарапымыздан біз интернетте төмендегі қарапайым қауіпсіздік шараларын сақтай отырып, полицияға қолымыздан келгенше көмек көрсете аламыз.

-Жеке және банктік деректеріңізді күмәнді сайттарда, мысалы, ұтыс ойындары сайтына және т.б енгізбеңіздер.

-«Банктерден», полиция және басқа да телефон қоңырауларына сенбеңіздер. Банктер мен мемлекеттік органдар сіздердің жеке деректеріңізді талап етпейтінін есте сақтаңыздар.

-Өз гаджеттеріңізге күмәнді қосымшалар мен бағдарламаларды орнатпаңыздар.

Жақындарыңызға қамқорлық жасап, қырағылық танытыңыздар.

• 07.06.2023
• 246