Ұлттық экономика министрі Citigroup басшылығымен кездесті

Астана халықаралық форумы аясында ҰЭМ басшысы Әлібек Қуантыров Citigroup компаниясының Еуропа, Таяу Шығыс және Африка елдері бойынша бас атқарушы директоры Дэвид Ливингстонмен және Citigroup мемлекеттік сектор жөніндегі жаһандық блогының басшысы Джули Монакомен келіссөздер өткізді. Кездесу іскерлік таңғы ас форматында өтті.

Тараптар Қазақстан Үкіметі мен CITI арасындағы ынтымақтастықтың тиімділігін атап өтіп, елдің экономикалық көрсеткіштерін талқылады.

Джули Монако

«Қазақстан тәуелсіз рейтингін сақтап тұр. Бұл бағытта Үкімет біраз жұмыс атқарды. Наурыз айында S&P Қазақстанның дербес кредиттік рейтингін растап, болжамды жақсартты. Мамырда Fitch ҚР-дың тәуелсіз кредиттік рейтингінің «BBB» деңгейінде екенін растады, болжам – «Тұрақты».

Өз кезегінде, министр инфляцияның шарықтауы, жеткізу тізбегіндегі үзілістер, жоғары пайыздық мөлшерлемелерге қарамастан, Қазақстан экономикасы сыртқы жағдайларға бейімделгенін атап өтті.

Әлібек Қуантыров

«Біз жалпы ішкі өнімнің өсу қарқынын сақтап қалдық. 2022 жылы экономикамыз 3,3% өсті. Ағымдағы жылдың төрт айында экономика 5% өсті. Өткен жылы біз $24 млрд. тікелей шетелдік инвестиция тартуды жоспарладық. Бірақ іс жүзінде $28 млрд. тарттық. Осылайша, өсу қарқыны 2021 жылмен салыстырғанда 18% құрады».

Сондай-ақ, кездесу барысында қаржы секторын, әйелдер кәсіпкерлігін, «жасыл» экономиканы дамыту және инвестиция тарту бойынша алдағы жоспарлар талқыланды.

Әңгіме соңында тараптар екіжақты ынтымақтастықты одан әрі нығайтуға дайын екендіктерін білдірді.

Citi Қазақстанда 1994 жылдан бері жұмыс істейді. Компания елдің қаржы секторында және шетелдік инвестицияларды тарту бойынша маңызды рөл атқарады.

• 09.06.2023
• 176