Қарқаралы ауданында жұмыс сапарымен болдым. Қарағайлыда су құбыры мен кәріз жүйесінің құрылысы қалай жүріп жатқанын тексеріп, тұрғындармен кездестім

Тұрғындарды сапалы ауыз сумен жабдықтау мәселесі Қарқаралы ауданы үшін өзекті мәселелердің бірі. Сондықтан биылғы жылы "Жарлы-Қарқаралы" су құбырын іске қосу аса маңызды. Томар және Матақ ауылдарындағы су құбыры желілерін қайта құру жұмыстарын бастадық. Сондай-ақ Бүркітті және Теректі ауылдарында су құбырлары салынуда.

Қарағайлы бойынша. Талды өзенінің жанынан сумен жабдықтауға арналған ұңғымалар бұрғыланды. Қазірдің өзінде 35 км су желісі салынды. Сондай-ақ мұнда абаттандыру, жарықтандыру жұмыстары жүргізіледі. Бұған қоса, иесіз қалған апатты көпқабатты үйлерді бұзу жұмыстары қолға алынды. Сонымен қатар елді-мекендегі электр желілері бойынша мәселе де менің бақылауымда.

Кездесуде тұрғындар жолдардың мәселесін көтерді. Биыл Қарағанды-Қарқаралы жолын жөндеуді жалғастырамыз. Аудан ішіндегі Ақтасты-Айырық жолы мен Қарабұлақ ауылына апаратын кірме жол жөнделеді. Ал келесі жылы Қарағайлы бағытындағы "Қарқаралы-Қ.Аманжолов" жолын күрделі жөндеуге кірісеміз.

Кездесуде ауыл тұрғындары жаттықтырушы мамандар мен бұқаралық спортқа арналған залдардың жетіспеушілігі мәселесін көтерді. Осы орайда "Ауыл – Ел бесігі" бағдарламасы бойынша Қарағайлыда ДШСК салуды жоспарлап отырмыз. Тұрғындардың өтініші бойынша мәдениет үйін де жөндейміз.

Аудан әкіміне Кәсіпкерлік басқармасымен бірлесіп, Қарқаралы ауданында туризмді дамыту бойынша үш жылдық жоспар әзірлеуді тапсырдым. Біз ауданның осы саладағы әлеуетін барынша дамытып, оны туристер үшін тартымды етуге тырысамыз.

Сонымен қатар келесі жылы Қарқаралы ауданы өзінің 200 жылдығын атап өтеді. Осыған орай біз бірқатар шараларды өткізуді жоспарлап отырмыз.

• 09.06.2023
• 253