Ақтауда ақын Анар Шамшадинованың шығармашылық кеші өтті

Ақтауда ақын Анар Шамшадинованың шығармашылық кеші өтті

Ақтауда өңір басшысы Нұрлан Ноғаевтың қатысуымен ақын Анар Шамшадинованың шығармашылық кеші өтті, деп хабарлайды Маңғыстау облысы әкімінің баспасөз қызметі. 

Іс-шараға Қазақстанның еңбек сіңірген қайраткері, «Құрмет» орденінің иегері, әнші Тамара Асар, Jasart Жастар театрының өкілдері, өнер сүйер қауым, сондай-ақ, қала қонақтары мен тұрғындары қатысты. 

Әйгілі ақынның шығармашылық кеші оның өлеңдерін оқудан басталды. Одан әрі Анар Шамшадинова жазған алтыншы кітаптың тұсаукесерімен жалғасты. 

Анар Шамшадинова Маңғыстау ақындары мен жазушыларының кітапхана аясында жарық көрген «Жанар», «Өзіңсіз күндер», «Жоқсың сен», «Тамызда  қайтып  оралшы» сияқты өлеңдер жинағының авторы. Сонымен қатар, оның өлеңдері Әзірбайжан, орыс, испан, қырғыз және түрік тілдеріне аударылған. 

Анар Шамшадинова Қазақстан Жазушылар және Журналистер Одағының мүшесі, “Ақпарат саласының үздігі” және “Халық алғысы”, төсбелгілерінің иегері. Сондай-ақ 7-шақырылымдағы Ақтау қалалық мәслихатының депутаты. 

Кеш соңында өңір басшысы Нұрлан Ноғаев Анар Шамшадинованың қазақ поэзиясының дамуына қосқан өлшеусіз үлесін атап өтіп, оған шығармашылық табыс тіледі. 

- Өз шығармаларыңыздың арқасында сіз ұлттық мәдениетімізді дәріптеп, рухымызды жаңғыртуға, қазақ поэзиясының дамуына зор үлес қосып келесіз. Сізді оқырмандарыңыз көптеген танымал әндердің авторы ретінде ғана емес, көрнекті қоғам қайраткері ретінде біледі, 
еңбегіңізді бағалайды және құрметтейді. 
Сізге зор денсаулық, шығармашылық табыс және ұзақ өмір тілеймін, - деді облыс әкімі Нұрлан Ноғаев.

• 14.06.2023
• 217