Нұрлан Ноғаев Астрахан облыстық Думасының делегациясымен кездесті

Ақтауда өңір басшысы Нұрлан Ноғаевтың қатысуымен Астрахан облыстық Думасының өкілдерімен кездесу өтті. Тараптар екіжақты ынтымақтастықты дамыту шараларын талқылады, деп хабарлайды Маңғыстау облысы әкімінің баспасөз қызметі.

Кездесуге Астрахан облыстық Думасының төрағасы Игорь Мартынов, «Қазақстан мәслихаттары депутаттарының бірлестігі» РҚБ төрағасы Төлеубек Мұқашев, Маңғыстау облыстық мәслихатының төрағасы Жаңбырбай Матаев, саяси партиялар филиалдарының төрағалары, сондай-ақ басқарма басшылары қатысты.

Естеріңізге сала кетейік, 2022 жылдың қыркүйегінде Астрахан облысының Думасы мен Қазақстан Республикасының Маңғыстау облыстық мәслихаты меморандумға қол қойған болатын. Құжат құқықтық база құру, форумдарға қатысу және бірлескен іс-шаралар өткізу сияқты екі жақты парламентаралық ынтымақтастықты дамытуды көздейді. Ол кезде меморандумға қол қою үшін Маңғыстау облыстық мәслихаты депуттарынан құралған делегация Астрахан облысына барған болатын.

Жұмыс сапары барысында астрахандық депутаттар өнеркәсіп саласындағы маңызды шара – «Қазақстанның үздік тауары» көрмесіне қатысты.

Маңғыстау облысының әкімі Нұрлан Ноғаев Қазақстан мен Ресей арасында экономикалық ынтымақтастық қарқынды дамып келе жатқанын, сондай-ақ өзара сауда және іске асып жатқан бірлескен жобаларды атап өтті.

- Біздің ресейлік серіктестермен ынтымақтастығымыз достық пен стратегиялық одақтастық қағидаттарына негізделген. Екі ел арасында өзара сауда табысты дамуда. Бұл ретте біз өнеркәсіпте, машина жасауда, энергетикада, көлік саласында және басқа да салаларда жаңа өндірістік тізбектерді құруды жеделдету маңызды деп санаймыз. Біздің облыстың әлеуеті зор. Маңғыстауда өңіріміз үшін ғана емес, еліміз үшін де маңызды ресейлік капиталы бар 300-ден астам компания тіркелген. Олардың ішіндегі ірі жобалардың бірі «Лукойл» және «ҚазМұнайГаз» компаниялары жүзеге асыратын жобалар екенін атап өткім келеді. Облыста тау-кен өнеркәсібінің, мұнай мен газдың қалыптасқан салаларынан бөлек логистикалық инфрақұрылым дамуда. Туризмді дамыту үшін бізде теңіз ғана емес, алыс және жақын шетелдерден туристерді қызықтыратын қасиетті мекендер де бар. Сондай-ақ, облыста балық шаруашылығы белсенді дамып келеді, - деді облыс әкімі Нұрлан Ноғаев.

• 15.06.2023
• 187