Маңғыстау облысының 50 жылдығы мен Ақтау қаласының 60 жылдығына арналған мерекелік шара өтті

14 маусым күні М.Өскінбаев атындағы облыстық филармонияда өңір басшысы Нұрлан Ноғаевтың қатысуымен Маңғыстау облысының 50 жылдығы, Ақтау қаласының 60 жылдығына арналған «Мерейлі мекен, мұнаралы Маңғыстау» атты есеп беру салтанатты шарасы өтті, деп хабарлайды Маңғыстау облысы әкімінің баспасөз қызметі.

Концерттік шараға жергілікті қоғам қайраткерлері, Астархан облысынан келген депуттар делегациясы, Ұлытау, Абай, Қостанай, Ақтөбе, Атырау, Батыс Қазақстан облысы мен Алматы қалаларынан келген бір топ депуттар, басқарма басшылары және қала тұрғындары мен қонақтары қатысты.

Сахнада мәдениет саласының үздіктері, опера және вокал әншілері, симфониялық оркестері, домбырашылар, «Ақшағала» этно-фольклорлық және вокалдық аспаптар ансамблі, «Ақжарма» фольклорлық ансамблі, Тамара Асар, Аида Байгелова, Бауыржан Ретбаев өнер көрсетті.

Маңғыстау облысының 50 жылдығы, Ақтау қаласының 60 жылдығына арналған шаралар тізбегі мамыр айында басталып жыл соңына дейін жалғасатын болады. Ал мерейтойды атап өтуге байланысты ауқымды мәдени, спорттық шаралар кешені қыркүйек айына жоспарланған.

Айта кетейік, Маңғыстау облысы — 1973 жылы 20 наурызда құрылған. Қазіргі таңда өңірде 2 қала мен 5 аудан, 59 ауылдық елді мекен бар. Оларда 750 мыңнан астам халық мекендейді, оның ішінде қала халқы - 349,2 мың болса, ал ауыл тұрғындарының саны - 423,4 мың адамды құрайды. Ақтау қаласының іргетасы 1963 жылы Каспий теңізінің жағасында қаланған.

Қазіргі таңда облыста 80 мыңнан астам жұмыс істеп тұрған шағын және орта кәсіпкерлік бар. Оның ішінде шағын бизнес саны 11 626 болса, орта – 116, және жеке кәсіпкерлік – 66 146, шаруа қожалықтар саны – 3 670 құрайды. Сонымен қатар, өңірде 25 ірі өнеркәсіп орындары бар.

• 15.06.2023
• 192