Ералы Тоғжанов жеңіл және жиһаз өнеркәсібі кәсіпорындарының басшыларымен саланы дамытудың өзекті мәселелерін талқылады

 Бүгін облыс әкімі Ералы Тоғжанов мүдделі мемлекеттік құрылымдар мен бизнес өкілдерімен кездесті.

Кездесу 80-ге жуық шағын және орта бизнес өкілдерінің қатысуымен өтті.
 
Облыс әкімі өндіріс саласындағы үлестің аздығына қарамастан, жеңіл және жиһаз өнеркәсібін дамыту басым бағыттардың бірі екенін атап өтті, өйткені өткізу нарығы кең, әлеуметтік маңызы бар және халықты көптеп жұмыспен қамтуға болады.

«Бүгінгі кездесудің мақсаты – жеңіл және жиһаз өнеркәсіптегі өндірушілердің мүдделеріне сәйкес келетін негізгі мәселелерді тыңдау, шешу жолдарын талқылау. Бұл салаларды дамыту әлеуеті зор. Өзекті сұрақтар мен проблемаларды бірлесіп шешу қажет», - деп атап өтті облыс әкімі Ералы Тоғжанов.
 
Кәсіпкерлердің мәселелеріне қатысты барлығы 20-ға жуық мәселе қаралды. Олардың көпшілігі белгілі бір кәсіпорындағы ағымдағы жағдайға байланысты.

Ортақ сұрақтардың қатарында өнімді өткізу және мемлекет тарапынан жеңілдіктеру беру мәселелері бар.
 
Өңірлік деңгейде жеңіл, жиһаз өнеркәсібі тауарларын мемлекеттік сатып алудағы жергілікті қамту үлесін ұлғайту, өңірдің ірі тапсырыс берушілері, оның ішінде жер қойнауын пайдаланушылармен ұзақмерзімді келісімшарттар жасасу, жеңіл өнеркәсіп өндірушілеріне сауда алаңдарын жалға беру кезінде субсидиялау түрінде жеңілдіктер қарастыру, осы мақсатта Ақтөбеде өнеркәсіп паркін ашу жөнінде ұсыныстар айтылды.

 «Бүгін айтылған барлық ұсыныстар мен мәселелер бақылауға алынып, олардың шешу жолдары нақтыланатын болады. Мен бұл салаларда жұмыс істейтін бизнестің өте белсенді екенін және уақыт өте келе импортты алмастыру мәселесін шеше алатынын көріп отырмын. Біздің тарапымыздан жан-жақты қолдау көрсетіледі», - деп түйіндеді облыс әкімі.

• 16.06.2023
• 161