Ақтауда дарынды оқушылар форумы өтті

16 маусымда облыс әкімі Нұрлан Ноғаевтың қатысуымен өңірдің дарынды оқушыларының форумы өтті, деп хабарлайды Маңғыстау облысы әкімінің баспасөз қызметі.

Форумға ғылыми-шығармашылық республикалық конкурстардың жүлдегерлері мен республикалық, президенттік, халықаралық олимпиядалардың жеңімпаздары, робототехника бойынша халықаралық біріншіліктің жүлдегерлері, дарынды оқушылардың ұстаздары мен ата-аналары, жергілікті білім беру ұйымдарының басшылары қатысты. 

Кездесуге облыс мектептерінің 160-тан астам оқушысы келді. Биыл олар халықаралық, республикалық олимпиадалар мен ғылыми жарыстарда 80-нен астам медаль жеңіп алған болса оның 35-і республикалық пәндік олимпиададан жүлдегер атанған. Сондай-ақ, республикалық байқауда Маңғыстау облысының командасы «Үздік олимпиадалық команда - 2023» номинациясының жеңімпазы деп танылған. 

Шараға қатысқан Нұрлан Ноғаев елдің ертеңі білімді жастар екенін атап, жиналған дарынды балалар мен олардың ата-аналарына және жетекшілеріне алғысын білдіріп, алдағы уақытқа сәттілік тіледі. 

-Біз өмір сүріп жатқан уақыт өзгерістерге және қобалжуларға толы. Бұл өз елінің тағдыры үшін жауапкершілікті өз мойнына алатын жас, бәсекеге қабілетті, жігерлі, талантты, белсенді адамдардың уақыты. Мемлекет басшысы Қасым-Жомарт Тоқаев өз сөзінде «Еліміздің алдында тұрған басты міндеттердің бірі – салауатты, саналы, білімді, ақыл-парасаты мол және ғылыми-мәдени өрісі кең ұрпақ тәрбиелеу» деген болатын. 
Осы орайда, өңірімізде оқушылардың білімге деген қызығушылығын арттыру, ғылымға баулу, қоғамда тұлға ретінде қалыптасуына ықпал ету, ақпараттық және коммуникативтік технологияларды ұтымды пайдалану, шығармашылығын дамыту бағытындағы жұмыстар оң нәтижелерін көрсетіп келеді. Бүгінгі білімді, дарынды оқушылар осының дәлелі. Жаңа ғасырда кемел білім мен кемеңгер ақыл-ой жолдасыңыз болсын!
Мектеп бітіріп жатқан жас түлектер қадамдарың сәтті болсын! Бәріңе ақ жол тілеймін! - деп өз құттықтау сөзін білдірді облыс әкімі Нұрлан Ноғаев. 

Оқушылар өңір басшысына өздерінің жетістіктері мен болашақ жоспарлары туралы айтып, талантты жастарды қолдағаны және даму мүмкіндігі үшін алғыстарын білдірді.
Барлық балалар облыс әкімінен естелік сыйлықтар, алғыс хаттар және қаржылай сертификаттар алды.

• 16.06.2023
• 148