Ақтөбе автопаркі маусым айының соңына дейін 100 жаңа автобуспен толығады

Облыс орталығына «Yutong» маркалы 75 автобус келді. Тағы 25-і 20 маусымға дейін әкелінеді деп күтілуде.
  
Бүгін облыс әкімі Ералы Тоғжанов жаңа автобустарды қарап шықты.
  
«Qala Trans» өкілдері қала маңындағы тұрғын үй алаптары және шаһар тұрғындары тарапынан өтініштердің көп түсуіне байланысты 19 маусымнан бастап № 7, 28, 5 маршруттарға қызмет көрсету үшін жаңа автобустар желіге шығатынын хабарлады.
  
«Yutong» маркалы автобустардың салоны 12 кондиционермен жабдықталған. Арнайы сенсор жүргізушінің шаршағандығын немесе жұмыстан алшақтап кеткенін автоматты түрде анықтайды. Сондай-ақ, алдыңғы әйнекке қойылған сенсор жолақты бақылап және жолдағы кедергілерді көрсетеді. Оқыс оқиға кезінде алдында келе жатырған көліктің тежегіші шұғыл басылса, автобус өздігінен тоқтайды.
  
Ералы Тоғжанов Ақтөбе қаласының ТКШ бөлімінің басшылығына Жаңақоныс, Шилісай, Ақжар-2 тұрғын үй алаптарын қоғамдық көлікпен қамтамасыз ету мәселесін шешуді тапсырды.
 
№5 бағыттағы қоғамдық көлік Жібек жолы тұрғын үй алабы тұрғындарына қызмет көрсетеді.
  
Айта кетейік, осы 100 жаңа автобустан бөлек, биылғы жылдың соңына дейін сыйымдылығы үлкен 50 автобус сатып алынады. Бұл Ақтөбедегі қоғамдық көлік жұмысының сапасы мәселесін күн тәртібінен алып тастауға мүмкіндік береді деп күтілуде.

• 19.06.2023
• 134