Былтыр маңғыстаулық 4 кәсіпкер мемлекеттен грант алды

2022 жылы маңғыстаулық 4 кәсіпкер мемлекеттен 5 млн теңге грант алды. Олар аталған қаржыға кәсібін дамытуда, деп хабарлайды Қоғамдық коммуникация орталығы. 

Мемлекеттік грантты берудегі басты мақсат - жұмыссыздықты жою. Грантқа ие болған кәсіпкерлер өзін ғана емес, қарамағындағы азаматтарды да жұмыспен қамтитын болады. Маңғыстау облыстық кәсіпкерлік және сауда басқармасы жоспарлау, мемлекеттік қызметтер бөлімінің басшысы Бағдат Қуандықтың айтуынша, аталған грантты  жеке кəсіпкер ретінде тіркелгеніне 3 жыл мерзімнен аспаған кез-келген кәсіпкер ала алады. 

-Грантқа ие болған кәсіпкерлерге бизнесін бастауға 6 ай уақыт беріледі. Сондай-ақ, кәсіп ашылған күннен бастап 18 ай бойы жұмыс тұрақты түрде жүріп жатқандығын қадағалау мақсатында мониторинг жүргізіліп отырады. Грант бөлінер кезде комиссия мүшелері ерекше, жаңашыл, тың идеясы бар кәсіпкерге баса назар аударады, - деді Бағдат Қуандық. 

Спикердің мәліметінше, грантқа ие болған әрбір кәсіпкер бүгінде кәсібінің нәсібін көріп, бірнеше адамды жұмыспен қамтып отыр. Грантқа ие болғандардың қатарында 28 жастағы ақтаулық Абай Сапар да бар. Ол қозықұйрық саңырауқұлақтарын өсірумен айналысады. Кәсіпкердің айтуынша, қозықұйрық арнайы температурасы мен ылғалдылық деңгейі тұрақты жылыжайда саңырауқұлақтың тұқымы себілген субстраттарда өсіріледі. Тұқымды дамытып, толық өнімді жинап алуға 60-70 күн шамасында уақыт кетеді.

-Тұтынушылардың негізгі көзі Ақтау қаласының тұрғындары, дүкендер мен мейрамханалар және тамақтану орындары. Бүгінде кәсібім бір жолға қойылып, жұмыс барысындағы кемшіліктерді жөндеуге ат салысып жатырмын. Болашақта саңырауқұлақтардың өзге де түрлерін өсіріп, тұтынушыға жеткізу жоспарда бар. Бұл кәсіп мен үшін қосымша табыс көзі. Жобаны үлкейту мақсатым бар. Онымен қоса, екі адамды жұмыспен қамтып отырмын, - деді Абай Сапар.

Мемлекеттен грант алған тағы бір кәсіпкер - Раушангүл Қуандықова. Қой-түйе жүнін өңдеп, түтіп, әртүрлі кәде сыйлар жасау арқылы кәсібін дамытып отырған ол, айына 500-ден аса кәдесый сататынын айтады.

-Маңғыстауда қой-түйе жүні желге ұшып, түк кəдеге жарамай, өртеніп, кей кезде көміліп жатқандығын көзбен көріп жүрміз. Сол себепті, ең алғаш болып жүнді өңдеу идеясы ойыма түсті. Әрі қарай, «Атамекен» ұлттық палатасына хабарласып, құжаттарымды дайындап, жобамды қорғап шықтым. Берілген қаражатты алып, жұмысымды бірден бастап кеттім. Қазіргі таңда Қарақия ауданындағы Құрық ауылында  кәсібімді әлеуметтік желі арқылы дамытып отырмын, - деді Раушангүл Қуандықова.

Сондай-ақ, грант иегерлерінің қатарында ешкі сүтін өндіру кәсібімен айналысатын ақтаулық Жұлдыздай Тоқсанқызы да бар. Бүгінде оның Мұнайлы ауданында орналасқан жеке цехы жұмыс жасап тұр. Қарауында сауыншы, технолог және даяр өнімді тасымалдаушы-жеткізуші бар. Жұлдызайдың айтуынша, ешкілерден күніне 15 литрге дейін сүт алады.

-Ебін тауып табысымды еселеуіме себепкер ешкілер күнделікті таңғы уақытта Жыңғылды ауылында сауылады. Ешкілерді жемдеу үшін жоңышқа егеміз. Бақшамызда өсетін алма, сәбіздермен азықтандырамыз. Сүт өнімдері Ақтау қаласы мен Мұнайлы ауданында сатылады. Осындай кәсіппен айналысуға мүмкіндік берген мемлекетке алғысым шексіз. Грант байқауы өте әділ өтті. Мемлекет кәсіпкерлерге жоғары деңгейде қолдау көрсетіп келеді,- деді Жұлдызай Тоқсанқызы.

• 20.06.2023
• 135