Маңғыстауға Чехия депутаттары келді

20 маусымда өңір басшысы Нұрлан Ноғаев Чехия Парламенті депутаттар палатасының Вице-спикері Ян Бартош бастаған Чех легионерлер қоғамының делегациясымен кездесті, деп хабарлайды Маңғыстау облысы әкімінің баспасөз қызметі. 

Сапардың мақсаты Бірінші дүниежүзілік соғыс кезіндегі әскери тұтқындардың жерлеу орындарына зиярат ету және Қазақстандағы чехтардың соғыс жылдарынан қалған және басқа да ескерткіштерін аралау. 

Кездесу барысында екі тарап бірінші дүниежүзілік соғыс кезіндегі жерлеу орындарын қорғау мәселелерін, сондай-ақ, Қазақстан мен Чехия арасындағы ынтымақтастықты талқылады. 

- Бірінші дүниежүзілік соғыс адамзат тарихындағы алғашқы және ең ауқымды соғыстардың бірі. Оның салдарынан көптеген адамдар зардап шекті, соның ішінде сіздің отандастарыңыз да бар. Мемлекет Басшысы Қасым-Жомарт Тоқаевтың тапсырмасын орындау мақсатында біз қолданыстағы заңнама шеңберінде елімізбен және Маңғыстау облысымен екіжақты ынтымақтастыққа ниетті серіктестерге барлық қолдау көрсетеміз. Біздің есігіміз инвесторлар үшін де, Чехиядан келген туристер үшін де әрқашан ашық, - деп атап өтті облыс әкімі Нұрлан Ноғаев. 

Айта кетейік, Қазақстан мен Чехия арасындағы қарым-қатынас жылдан жылға дамып келеді. Чехия Маңғыстаудың сыртқы сауда қатынастарында да маңызды рөл атқарады. Маңғыстау облысы мен Чехия арасындағы сыртқы сауда айналымы 2023 жылғы қаңтар-наурызда 1,8 млн. долларды құраған. Оның ішінде экспорт көлемі - 86,5 мың доллар болса, ал импорт - 1,7 млн. доллар. Қазіргі таңда өңірде экономиканың түрлі салаларында чех капиталының қатысуымен 4 бірлескен кәсіпорын тіркелген.

• 20.06.2023
• 166