Медицина саласының өзекті мәселелері басты назарда

Қазақстан Республикасының Денсаулық сақтау бірінші вице-министрі Тимур Сұлтанғазиев Ақмола облысына жұмыс сапары барысында бірқатар медициналық нысандардың жұмысымен танысты.

Тимур Сұлтанғазиев танысқан алғашқы нысан Степногорск көпсалалы қалалық ауруханасы болды. Медициналық мекеме тәулік бойы 247  және 30-ға жуық күндізгі ем-дом шараларын жүргізуге қауқарлы. Мұнда 9 негізгі клиникалық бөлім жұмыс істейді. Сонымен қатар, ауруханада 9 көмекші емдеу-диагностикалық бөлімше бар.

Денсаулық сақтау министрінің бірінші орынбасары аурухананың жай-күйімен және медициналық жабдықтармен танысты. Тимур Сұлтанғазиев емдеудің жоғары сапасын және пациенттердің қажеттіліктеріне бағдарлануды қамтамасыз ету қажеттігін атап өтті. Аурухананың бас дәрігерінің міндетін атқарушы Бағлан Наурызбаеваның айтуынша, пациенттер көп сала бойынша медициналық көмек ала алады. Бұл жалпы терапия, жалпы және балалар хирургиясы, кардиология, неврология, травматология, акушерлік-гинекология, педиатрия, неонатология, инсультология, реабилитология, жұқпалы аурулар. Нейрохирург дәрігерлерінің, неврологтардың, реабилитологтардың, емдік дене шынықтыру нұсқаушыларының, психиатрдың, кардиологтың, нейрореаниматологтардың көпсалалы бригадасы науқастарға шұғыл көмек көрсетеді.

Бұдан әрі Тимур Сұлтанғазиев "Viamedis" ЖШС Степногорск қалалық емханасының қызметімен танысты. Бүгінде ол ауысымда 1020 науқасты қабылдай алады және тек Степногорск қаласына ғана емес, жақын маңдағы елді мекендерге де қызмет көрсетеді. Емхана 100% заманауи жабдықтармен жабдықталған. Мұнда 86 дәрігер амбулаториялық-емханалық, консультациялық-диагностикалық және стационарды алмастыратын көмек көрсетеді. Бірінші вице-министр емхананың заманауи медициналық аппараттармен және қондырғылармен толық жабдықталғанын атап өтті, бұл дәрігерлердің мүмкіндігін кеңейтіп, пациенттерге уақтылы және сапалы көмек көрсетуге мүмкіндік береді.

Көкшетауда денсаулық сақтаудың бірінші вице-министрі көпсалалы облыстық аурухана жанындағы онкологиялық орталығының емханасына барды. Емхана 2020 жылы ашылып, ауысымына 150 науқасқа есептелген. Мұнда медициналық көмектің үш түрі мен төрт формасы бар. Медициналық қызметтерді жоғары білікті 37 дәрігер көрсетеді. Тимур Сұлтанғазиев сонымен қатар көпсалалы облыстық аурухананың жүрек орталығының қызметімен танысты. Жүрек орталығы мамандандырылған және жоғары технологиялық медициналық көмек көрсетеді . Ақмола облыстық көпсалалы облыстық ауруханасының бас дәрігері Нұрлан Жаровтың айтуынша, жүрек орталығында тәулік бойы жұмыс істейтін 72 төсек бар және заманауи медициналық жабдықтармен толық қамтамасыз етілген. Сонымен қатар, «Кешенді медициналық ақпараттық жүйе» бағдарламалық қамтамасыз ету табысты жұмыс жүргізуде. Орталықта жоғары білікті кардиологтар мен кардиохирургтар жұмыс істейді, олардың тәжірибесі ашық жүрекке күрделі операциялар жасауға мүмкіндік береді. Жылына орта есеппен олар жүрек пен жүрек-тамыр жүйесіне үш жүзге жуық күрделі операция жасай алады. Жыл сайын мұнда хирургиялық араласудың жаңа түрлері көбірек қолданылады. Мысалы, рентгендік операция бөлмесінде көпфункционалды ангиографиялық кешеннің көмегімен дәл диагностика және кесусіз шұғыл операциялар жасалады.

Денсаулық сақтаудың бірінші вице-министрі Тимур Сұлтанғазиев аурулардың алдын алуды күшейтуге және пациенттерді уақтылы диспансерлеуге назар аударды. Ол сондай-ақ дәрігерлермен емдеудің және әртүрлі медициналық қызметтерді көрсетудің өзекті мәселелерін талқылады.

Жұмыс сапары аясында Тимур Сұлтанғазиев Ақмола облысының тұрғындарымен Көкшетау мен Степногорск қалаларында кездесу өткізді. Денсаулық сақтау бірінші вице-министрі өңір тұрғындарына алғашқы медициналық-санитарлық көмекті дамытудың басым бағыттары, медициналық объектілердің жай-күйін жақсарту жөніндегі шаралар, кадр саясаты және дәрі-дәрмекпен қамтамасыз ету туралы айтып берді. Пациенттердің құқықтарын қорғау, дәрігерлердің мәртебесін нығайту және ауылдағы медициналық қызмет көрсету деңгейі мәселелері де қозғалды.

Тимур Сұлтанғазиев азаматтарды жеке қабылдады. Әрбір өтініш және сұрақтар бойынша денсаулық сақтау министрінің бірінші орынбасары толық жауаптар мен түсініктемелер берді. Кейбір мәселелер бойынша ол жергілікті органдарға оларды шешуге жәрдемдесуді және қажетті шараларды қабылдауды тапсырды.

Жұмыс сапарының соңында денсаулық сақтау бірінші вице-министрі жергілікті және республикалық бұқаралық ақпарат құралдарының сұрақтарына жауап берді. Олар негізінен медициналық инфрақұрылымды дамытуға, кадрлармен қамтамасыз етуге, халыққа медициналық көмек көрсету сапасына және дәрі-дәрмекпен қамтамасыз етуге қатысты болды.

• 02.07.2023
• 184