Ел бойынша әрбір екінші мамандандырылған автомобиль, егін жинайтын комбайн Ақмола облысында шығарылады

Орталық коммуникациялар қызметінің алаңында өткен брифингте Ақмола облысының әлеуметтік-экономикалық дамуы туралы өңір басшысы Ермек Маржықпаев айтып берді.

Биыл қаңтар-сәуір айының қорытындысы бойынша өнеркәсіп салалары серпінінің жоғары деңгейіне қол жеткізілді, өткен жылдың сәйкес кезеңіне қарағанда 15% өсіммен 550 млрд теңгеден астам өнім шығарылды, деп атап өтті облыс әкімі. Базалық салаларда – металлургия, машина жасау, тамақ өнімдерін өндіруде өсім қамтамасыз етілді.

Спикердің айтуынша, облыста комбайндар өндірісі 2,5 есе, тракторлар өндірісі 1,5 есе өсті. Өңделмеген алтын өндірісі 37%-ға өсті.

«Өсім өткен жылы жаңа өндірістік қуаттарды енгізумен өнеркәсіптік әлеуетті ұлғайту есебінен қамтамасыз етілді. Біз 261 млрд теңгеге 163 жобаны іске асырып, 3.5 мың жаңа жұмыс орнын аштық», – деді өңір басшысы.

Облыс үшін ең маңызды нысандардың ішінде әкім алтын өндіретін фабриканы, кірпіш зауытын, кен өңдеуге бейімделген фабриканы атады. Биыл жоспарланып отырған жобалардың ішінде жел станциясының бірінші кезегін және Макинск құс фабрикасының үшінші кезегін салу, қуаты 5 МВТ биогаз зауытын салу және басқа да өндірістер бар.

«Өткен жылы тауар өндірісі көлемінің рекордтық көрсеткішіне қол жеткізілді, ол 1,5 трлн теңгеден асты. Биыл біз бұл межеден өтуге ниеттіміз», – деді Е.Маржықпаев.

Өңір басшысы атап өткендей, облыс 15% үлесімен тауық жұмыртқасын өндіру бойынша республикада бірінші орынға шықты. Сондай-ақ облыс ет өңдеу көлемі бойынша екінші, сүт өндіру бойынша үшінші, сары май мен ұн бойынша төртінші орында. Өткен жылы астық экспортының көлемі 2,2 млн тоннаны құрады. Облыс АӨК өнімдерінің 46 пайызын таяу және қиыр шетелге жөнелтеді.

«Біз азық-түлікпен өзімізді өзіміз қамтамасыз ету мәселелерін шешеміз және азық-түлік белдеуі аясында облыс пен Астананың азық-түлік қауіпсіздігін қамтамасыз етеміз», – деп сендірді облыс әкімі.

• 02.07.2023
• 151