Ақмолалық оқушылар ашыған сүт өнімдерінің қоректік құндылығын арттыратын қоспалар әзірледі

Көкшетау қаласы, Абай атындағы (қазақ тілінде оқытылатын) дарынды балаларға арналған №3 облыстық мамандандырылған мектеп-интернатының 11-сынып оқушылары Абжанова Махаббат пен Тлеуғабыл Сабина ашыған сүт өнімдерінің қоректік құндылығын арттыратын қоспалар әзірледі.

Зерттеу жұмысы химия пәні мұғалімі Сағатай Айдана Асқарқызының жетекшілігімен жүргізілді.

Жас зерттеушілер шырғанақтың ресми және халықтық медицинада бактерияларды өлтіретін, қабынуға қарсы жараларды емдейтін дәрілік зат ретінде қолданылатынын негізге ала отырып, халық үшін пайдалы өнім жасауды ұйғарды. Эксперименттік бөлім Ш.Уәлиханов атындағы Көкшетау университетінің химия және биотехнология кафедрасының зертханаларында х.ғ.к., қауымдастырылған профессор Нурмуханбетова Нургуль Нуркеновнаның басшылығымен өткізілді.

«Жұмысымыздың нәтижесінде балғын шырғанақ йогурты дайындалды. Зерттеулер барысында сүт өнімдерінің А, Е, С дәрумендерімен, пальмитин және стеарин қышқылдарымен байытылғаны анықталды» - деп бөліседі қыздар.

Махаббат пен Сабинаның жұмысы биылғы республикалық ғылыми жобалар конкурсында химия секциясы бойынша үшінші орын жеңіп алды.

• 02.07.2023
• 163