ҚР ҰЭМ басшылығы «Ақ жол» партиясында жаңа Салық кодексінің жобасын талқылауға қатысты

Жаңа Салық кодексін әзірлеу шеңберінде салықтық әкімшілендіру мәселелері талқыланған екінші кеңеске ҚР ҰЭМ басшысы Әлібек Қуантыров, «Ақ жол» партиясының төрағасы, ҚР Парламенті Мәжілісінің депутаты Азат Перуашев, ҚР Ұлттық экономика вице-министрі Азамат Әмрин, сондай-ақ, ҚР Парламенті Мәжіліс депутаттары, ҚР Қаржы министрлігінің өкілдері мен кәсіпкерлер қатысты.

Талқылаудың негізгі тақырыбы ҚР Қаржы министрлігінің салықтық әкімшілендіруді жаңарту және сервистік модельге көшу жөніндегі ұсыныстары болды.

Шара барысында Ә. Қуантыров негізгі реформа әкімшілендіру мәселелерін жеңілдетуге, сонымен қатар тәуекелдерді басқару жүйесін жетілдіруге бағытталғанын атап өтті.

«Жауапкершілік тарту мәселесіне келетін болсақ, біз Еуропа елдерінде, АҚШ-та салықтық міндеттемелер үшін жауапкершіліктің сақталуына аса мән берілетінін көріп отырмыз. Ол жақта бизнеске қатаң шаралар қолдану қарастырылған. Біз, өз кезегімізде, икемділік пен адалдық принциптерін қолдану ұстанымымен жұмыс істеуіміз керек. Салықтық әкімшілендіруді дұрыс жолға қою керек. Мемлекет бірінші кезекте бизнестің мүддесін қорғауға, содан кейін фискалдық органдардың қызметіне жұмыс істеуі керек», - деп атап өтті министр.

Қазіргі уақытта жаңа Салық кодексінің жобасын әзірлеу жұмыстары жүргізілуде. Салықтық әкімшілендіруді оңайлатуға және цифрландыруға ерекше назар аударылатын болады. Аталған кешенді жұмыс бизнес өкілдерінің, оның ішінде «Атамекен» ҰКП және салық саласындағы сарапшылардың қатысуымен жүргізіледі.

• 03.07.2023
• 172