Құрметті ақмолалықтар! Сіздерді мемлекеттік мереке – Қазақстан Республикасының астанасы күнімен шын жүректен құттықтаймын!

Астана – мемлекетіміздің жаңғыруының нышаны, Жаңа Қазақстанның символы, аз ғана уақыт ішінде қайталанбас сәулетімен заманауи мегаполиске айналған, ұлан-байтақ қазақ даласының көркем айшығына ұласқан жаңашылдықтың, инновациялар мен ірі мәдени шаралардың өзегі.

Әрбір елде тарихта өшпес із қалдырған жетістік пен көшбасшылықтың өлшеміне айналған қалалар бар. Егемен Қазақстан үшін жас астанамыз осындай символға айналды.

Бүгінде Астана жай ғана гүлденген қала емес. Дәл осы жерде еліміздің тұрақты дамуының іргетасы қаланып, тағдырлы шешімдер қабылданып, әлем көшбасшыларының кездесулері мен жоғары деңгейдегі халықаралық іс-шаралар өткізіледі. Біздің көпұлтты, көпмәдениетті астанамыз тәуелсіз Қазақстанныңжарқын көрінісінің, түрлі этностағы қазақстандықтардың өзара сенімі мен түсіністігінің, басқа халықтарға, яғни, қонақтарымыз бен көршілерімізге деген құрмет пен достық сезіміміздің символына айналды. Сондықтан да Елорда күні тек Астана тұрғындары үшін ғана емес, әрбір қазақстандық үшін ерекше мереке.

Қарқынды дамып келе жатқан жас астана бүкіл елімізді сенімді түрде алға бастап келеді. Мемлекетіміздің экономикалық, саяси және әлеуметтік табыстары, мыңдаған қазақстандықтардың армандары, үміттері мен болашағы осы астанамызбен тығыз байланысты.

Құрметті жерлестер!

Әрқашан біздің мақтанышымыз, біздің Отанымыздың жүрегі – ару Астана жасарып, жайнай берсін! Елордамыз жылдан-жылға көркейіп, жайлы, жаңалықтарға толы болып, әлемдік қауымдастықта өзінің лайықты орнын нығайта түссін.

Осы мереке күні ақмолалықтардың әрбір отбасына шын жүректен денсаулық, амандық, мейірім мен жаңа жетістіктер тілеймін! Біздің Отанымыз Қазақстан Республикасы – гүлдене берсін!

• 07.07.2023
• 146