Ақтөбе облысында 2023 жылдың қорытындысы бойынша ауылдық елді мекенді сапалы ауыз сумен қамту көрсеткіші 99,7%-ға жетеді

Былтырғы жылдың қорытындысы бойынша Ақтөбе облысының қалалары 100% сумен жабдықталса, ауылдық жерлерде көрсеткіш 95,5%-ға жетті.

2023 жылдың соңына дейін 18 ауылда сумен жабдықтау жобалары іске асып, 14 ауылда кешенді блок-модульдер орнатылады. Нәтижесінде ауылдық елді мекендерді ауыз сумен қамтамасыз ету 99,7%-ды құрайды.

Айта кетейік, өңіріміз халықты сапалы ауыз сумен қамтамасыз ету туралы Президент тапсырмасын 2024 жылы толықтай орындауды жоспарлап отыр.

Ауылдық елді мекендерді газдандыру ауыл тұрғындарын толғандыратын және өзекті мәселелердің бірі болып қала береді.

Энергетика және тұрғын үй-коммуналдық шаруашылық басқармасының деректеріне сүйенсек, 2023 жылдың қорытындысы бойынша 12 ауылдың тұрғындары көгілдір отынның игілігін көреді, тиісінше халықты газбен қамту көрсеткіші 94,4%-ға дейін ұлғаяды.

Дәлірек айтқанда, газдандыру жұмыстары Әйтеке би ауданының Құмқұдық, Ырғыз ауданының Аманкөл және Нұра, Қарғалы ауданының Әлімбет, Мәртөк ауданының Байтұрасай және Қаратаусай, Мұғалжар ауданының Мұғалжар және Жарық, Темір ауданының Алтықарасу және Еңбекші, Ойыл ауданының Екпетал, Хромтау ауданының Құдықсай ауылдарында жүргізіледі.

• 12.07.2023
• 113