Нұрлан Ноғаев Маңғыстаудағы ауыз су тапшылығы мәселесі кезең-кезеңімен шешілетінін айтты

Үкімет отырысында Нұрлан Ноғаев Маңғыстауда ауыз су тапшылығын шешу үшін жүргізіліп жатқан кешенді шараларды атап өтті, деп хабарлайды Маңғыстау облысы әкімінің баспасөз қызметі.

Негізгі жобалардың бірі «Каспий» тұщыту зауытының қуатын тәулігіне 20 мың текше метрден тәулігіне 40 мың текше метрге дейін ұлғайту болып табылады. Қазіргі уақытта құрылыс-монтаждау жұмыстарының 80% аяқталған.

- Маңғыстау облысында мамыр және қыркүйек айларында ауыз су тапшылығы байқалады. Бірнеше күн бұрын Мұнайлы ауданында сумен жабдықтау мәселесі туындап, уақтылы қабылданған шаралардың арқасында бұл мәселе шешілді. Мемлекет басшысының тапсырмасына сәйкес осы мәселені шешу бойынша бірнеше жоба іске асырылуда. Қазіргі уақытта Үкімет «Каспий» тұщыту зауытының қуаттылығын ұлғайтуға 5,6 млрд теңге бөлді. Бұл облыстың үш ауданында 180 мың адамды сумен қамтамасыз етуге мүмкіндік береді, - деді облыс әкімі Нұрлан Ноғаев.

Жоба жаңа өндірістік цехтар салуды, инфрақұрылымды жаңартуды және суды тазарту мен сүзудің заманауи жүйелерін орнатуды көздейді. Жобаның жалпы құны 18,1 млрд. теңгені құрайды, бас мердігер - «Caspian Contractors Trust» ЖШС, технологиялық жабдықты жеткізуші - катарлық «Metito Overseas Limited» компаниясы.

• 12.07.2023
• 158