Ақмола облысында облыстық мәслихаттың бірінші сессиясы өтті

Облыс әкімі Ермек Маржықпаев пен облыстық сайлау комиссиясының төрағасы Манарбек Сәдуовтың қатысуымен сегізінші шақырылған Ақмола облыстық мәслихатының бірінші ұйымдастыру сессиясы өтті.

Сессияға облыстық мәслихат депутаттары мен аудандық мәслихат хатшыларынан басқа басқармалар мен департаменттердің басшылары, қоғамдық кеңестің, БАҚ өкілдері шақырылды. 

Ақмола облыстық мәслихатының депутаттарын сайлау қорытындыларын айта келе, аумақтық сайлау комиссиясының төрағасы Манарбек Сәдуов сайланған депутаттарға куәліктер мен төсбелгілерді табыс етті.

Ақмола облыстық мәслихатының төрағасы болып "AMANAT" партиясының депутаты Бейбіт Жүсіпов сайланды, оның кандидатурасын жаңадан сайланған депутаттар бірауыздан мақұлдады.  Сондай-ақ, сессия барысында облыстық мәслихаттың тұрақты комиссиялары құрылып, олардың төрағалары мен құрамдары сайланды.  

Ашық дауыс беру қорытындысы бойынша экономика және бюджет мәселелері жөніндегі тұрақты комиссияның төрағасы болып Марат Қойшыбаев сайланды, әлеуметтік мәселелер жөніндегі комиссияны Айнагүл Балташева басқарады. Депутаттық этика, заңдылық, экология және табиғатты пайдалану мәселелері жөніндегі тұрақты комиссияның төрағасы болып Павел Безвербный сайланды. Аграрлық мәселелер және индустриялық-инновациялық даму жөніндегі комиссияны Саят Сыздықов басқарады.

Облыстық мәслихатта көпшілік орынға ие болған "AMANAT" партиясының депутаттық фракциясы тіркелді. 
Облыстық мәслихаттың кезекті екінші сессиясына 2022 жылға арналған облыстық бюджеттің атқарылуы туралы мәселені енгізу ұсынылды.

Сессия соңында депутаттарға облыс әкімі Ермек Маржықпаев жүгінді.

"Өткен сайлау өткен жылдың басты қоғамдық-саяси оқиғасы болып табылады. Мемлекет басшысы жаңа сайланған Қазақстан Республикасы Парламентінің бірінші сессиясында сөйлеген сөзінде бұдан былай партиялар біздің еліміздің болашағын айқындайтын саяси процестердің жолында жүретінін атап өтті. Көптеген жылдар ішінде алғаш рет депутаттар пайда болды, олар өз бетінше алға шықты және бәсекелестікте партиялардан үміткерлерді айналып өте алды.

Қазіргі, сегізінші шақырылымдағы депутаттардың міндеті-бүгінгі талаптарға сай болу және азаматтардың тілектеріне жауап беру. Облыстың аудандары мен қалалары бойынша өткен сайлаудың қорытындысы көрсеткендей, партиялар мен кандидаттар өздерінің саяси жетілуін көрсетті, қарсыластарына қатысты дұрыс емес мінез - құлыққа және өзге де өрескел бұзушылықтарға жол бермеді", - деп атап өтті өңір басшысы.

Сондай-ақ, облыс басшысы облыстың әлеуметтік-экономикалық дамуының негізгі көрсеткіштеріне қысқаша тоқталып, депутаттық корпуспен бірлесіп шешілетін бірқатар бірінші кезектегі міндеттерді атап өтті.

Айта кетейік, сайлау қорытындысы бойынша облыстық мәслихаттың жаңа құрамын жаңарту 70% - дан асты. Облыстық мәслихатқа Аманат, Ақ жол, Ауыл 3 саяси партиясы кірді, бұдан басқа, өзін-өзі ұсынған 4 партиясыз депутат бар.

Осы жылдан бастап мәслихат хатшысының орнына мәслихат төрағасы лауазымы енгізілді.

• 18.07.2023
• 180