Ақтөбе облысына бірінші жартыжылдықтың қорытындысы бойынша 354,9 млрд теңге инвестиция тартылды

Ақтөбе облысының әкімі Ералы Тоғжанов өңірлік инвестициялық штаб отырысын өткізді, онда негізгі капиталға салынатын инвестициялардың нысаналы индикаторларының орындалу қарқыны және басқа да бірқатар мәселелер қаралды.

Индустриялық-инновациялық даму басқармасының басшысы Қуандық Қасымов биылғы жылдың алты айының қорытындысы бойынша негізгі капиталға салынған инвестициялар 354,9 млрд теңгені құрағанын мәлімдеді. Тартылған инвестициялар көлемі бойынша салалар арасында өнеркәсіп көш бастап тұр, инвестициялардың жалпы көлемінің 75%-ын құрайды.

Аудандар бөлінісінде Хромтау және Темір аудандарында оң динамика байқалса, Байғанин, Қобда, Ырғыз, Ойыл, Шалқар және Алға аудандары – аутсайдерлер қатарында.

Облыс әкімі инвестиция тарту – өңір экономикасын дамытудың негізгі құралдарының бірі екенін алға тартты.
 

 «Еліміздің әлеуметтік-экономикалық даму мәселелері жөніндегі кеңейтілген кеңесте Мемлекет басшысы инвестициялар тарту жөніндегі жұмысты жандандыруды тапсырды. Бұл – Президенттің тікелей тапсырмасы. Экономиканың өсу қарқыны, аймақ халқының өмір сүру деңгейі көбінесе инвестицияларды тартуға байланысты. Осы себепті аудандар мен Ақтөбе қаласының әкімдіктері нысаналы индикаторларға толық қол жеткізуді қамтамасыз етуі қажет», - деді Ералы Тоғжанов.

Айта кетейік, Ақтөбе облысында Үкімет белгілеген индикаторларға қол жеткізу мақсатында 6,7 трлн теңге сомасына 104 инвестициялық жобаның пулы құрылды, оны іске асыру барысында 2027 жылға дейін 17 мыңнан астам жұмыс орны құрылады. Пулдың негізгі үлесі Тау-кен металлургия, металлургия, мұнай-химия және энергетика салаларындағы жобаларға тиесілі.

Жиынға қатысушылар қысқа және ұзақ мерзімді перспективадағы ірі инвестициялық жобаларды іске асырудың өзекті мәселелерін қарады.

Отырыс қорытындысы бойынша Ералы Тоғжанов жауапты мемлекеттік органдар мен ұйымдарға проблемалық мәселелерді шешу, инвестициялық ахуалды одан әрі жақсарту және биылғы жылға арналған инвестицияларды, оның ішінде тікелей шетелдік инвестицияларды тарту жөніндегі жоспарларға қол жеткізу жөнінде жан-жақты шаралар қабылдауды тапсырды.

• 19.07.2023
• 216